Tags-Tauba

duḳht-e-raz ko na ziyāñ dī na kabhī tauba kī
ahd nāseh se na paimāne se paimāñ koī

husn-e-yaktā kī rahzanī tauba
ik fareb-e-navā ne luuT liyā

haa.e vo zulf-e-mushk-bū tauba
ham ko bād-e-sabā ne luuT liyā

rahbarī thī ki rahzanī tauba
ham ko farmāñ-ravā ne luuT liyā

mai se maiñ tauba kar lūñgā ye lo merī tauba hai
pahle mere hāthoñ meñ apnī āñkhoñ ke mai-ḳhāne do

ba-faiz-e-hazrat-e-nāseh huī taufīq tauba kī
mirā jām-e-shikasta un ke shukrāne meñ rakh denā

ab ek tauba pe aatī hai maġhfirat tire haath
ḳharīd kar ki nihāyat ye jins sastī hai

TuuT kar mai pe yuuñ girī tauba
jaise parvāna sham-e-mahfil par

mai se tauba to kī 'azīz' magar
aksar auqāt yaad aatī hai

phir ghaTā uThne lagī tauba ke phir laale paḌe
phir ḳhushāmad terī ai pīr-e-muġhāñ hone lagī

kab talak āḳhir ye sahtī rahtī ḳhvāboñ kī tapish
tañg aa kar niiñd ne palkoñ se lo tauba kiyā

pārsā.ī kī javāñ-margī na pūchh
tauba karnī thī ki badlī chhā ga.ī

ālam-e-mastī kī tauba al-amāñ
pārsā.ī nashsha ban kar chhā ga.ī

tauba kī magar nashshe se us hūr-shiyam ne
kyuuñ ātish-e-mai nār-e-jahannam nazar aa.ī

ḳhudā kī shaan hai ye baat aur muñh un kā
'nizām' phir karūñ tauba sharāb piine se

ab na dastak meñ sadā hai na hai zanjīr meñ shor
band ab tak na huā thā dar-e-tauba aisā

gae tum duur jab se dil ye kahtā hai karo tauba
maza aatā nahīñ ḳhud hī uThā kar jaam piine meñ

shikast-e-paimāñ kā ham ko aadī kiyā hai ik mast-e-nosh-e-lab ne
ba-maslahat ham hue haiñ taa.ib ye tauba āḳhir shikastnī hai

zāhid mirī samajh meñ to donoñ gunāh haiñ
tū but-shikan huā jo maiñ tauba-shikan huā

tirī nigāh kī shauq-āfrīniyāñ tauba
jo kāmyāb hai vo bhī to kāmyāb nahīñ