Tags-Aagahi

maiñ ne kahā ki zindagī dard diyā gayā mujhe
maiñ ne kahā ki āgahī zahr pilā diyā gayā

na.ī ġhazal kā na.ī fikr-o-āgagī kā varaq
zamāna khol rahā hai suḳhanvarī kā varaq

diye haiñ rañj saare āgahī ne
añdhere meñ rakhā hai raushnī ne

baste jaate haiñ nagar dil haiñ tabāh o vīrāñ
āgahī dushman-e-duniyā-e-sukūñ hai ki nahīñ

ḳhamoshiyoñ meñ hai īmān-o-āgahī kī jilā
umīd-o-bīm se aage nayā hī aalam hai

na hote ham to zamāne kī āgahī kī qasam
na lauh miltī na tum ko kahīñ qalam milte

jab milī āvārgī ko manzil-e-ḳhud-āgahī
dasht meñ kho.e huoñ ko apne ghar bhī lā.egī

ba-hazār dānish-o-āgahī mirī maslahat hai abhī yahī
maiñ 'surūr'-e-rahrav-e-shab sahī mirī dastaras meñ sahar bhī hai

ye aur baat ki vo sab se pahle Duub gayā
tumhārā 'tāj' bhī ḳhud-āgahī kī tair meñ thā

agarche dastaras meñ āgahī hai saarī duniyā
magar dil kī taraf bhī ek dar vā ho gayā hai

maiñ samjhā thā siyegī āgahī chāk-e-junūñ ko
magar ye zaḳhm to pahle se gahrā ho gayā hai

āgahī karb vafā sabr tamannā ehsās
mere hī siine meñ utre haiñ ye ḳhanjar saare

āgahī kā jis meñ ik rauzan na ho
us makān-e-zāt kā naqsha badal

kuchh is ḳhatā kī sazā bhī to kam nahīñ miltī
ġharīb-e-shahr ko ik jurm-e-āgahī hai bahut

jur.at-e-shauq ke sivā ḳhalvatiyān-e-ḳhās ko
ik tire ġham kī āgahī tā-ba-savāl le ga.ī

jahl ko āgahī banāte hue
mil gayā raushnī banāte hue

Dubo.e detā hai ḳhud-āgahī kā baar mujhe
maiñ Dhaltā nashsha huuñ mauj-e-tarab ubhār mujhe

haTā rahā huuñ shab-o-roz is liye ḳhud ko
fanā ke raaz se mujh ko bhī āgahī ho jaa.e

āgahī shart hai gumrahī ke liye
gumrahī par patā pūchhnā jurm hai

kaif-o-nashāt jis se milā ham ko bārhā
is karb-e-āgahī kā maza ham se pūchhiye