Tags-Aagahi

jahl kā hai bol baalā chaar sū
āgahī anqā huī hai aaj kal

ḳhabar tasavvur ḳhayāl īmāñ gumāñ yaqīñ fikr ilm hikmat
maqām-e-ḳhud-āgahī ke aage savād-e-kam-āgahī kī sūrat

'darshan'-e-mast se mileñ kholegā rāz-e-āgahī
garche vahāñ hai jis jagah apnī use ḳhabar nahīñ

ye hāl-e-zār to āshob-e-āgahī se huā
ki gul-darīda-jigar mauja-e-sabā se na thā

ye kis maqām par hai aaj raḳhsh-e-fikr-o-āgahī
ki jibra.īl ko bhī ham-rikāb dekhtā huuñ maiñ

haiñ azal tā abad TūTte ā.īne
āgahī ne kahāñ lā ke maarā mujhe

tujhe kārobār ko din milā mujhe kāhish-e-shab-e-ġham milī
mujhe ḳhvāhish-e-ġham-e-āgahī tujhe ḳhvāhish-e-zar-o-māl hai

sahrā.iyoñ se sīkhe koī rumūz-e-hastī
ābādiyoñ meñ akasr dushman haiñ āgahī ke

ishq ko ek nazar kaafī hai
āgahī pahle se darkār nahīñ

vo jalāl-e-sheva-e-sādgī vo jamāl-e-sūrat-e-zindagī
vo zulāl-e-chashma-e-āgahī ki zamāna-bhar ko jagā diyā

be-ḳhudī achchhī thī ab to āgahī kī shakl meñ
ġham hī ġham nā-vāqif-e-anjām le kar aa.e haiñ

nā-āgahī kī raat bhī kitnī latīf thī
ye āgahī kī dhuup hai chehra jalā na de

tumheñ jo mere ġham-e-dil se āgahī ho jaa.e
jigar meñ phuul khileñ aañkh shabnamī ho jaa.e

sarīr-e-ḳhāma se tashrīh-e-sirr-e-zī hogī
fazā-e-sher meñ iqlīm-e-āgahī hogī

āgahī dānish duā jazba aqīda falsafa
itnī qabreñ haa.e kis kis par diyā raushan kareñ

hai abhī mahdūd merī āgahī
maiñ to itnā jāntā huuñ aur bas

vo jin ko kar gayā be nuur āgahī kā tilism
kahāñ in āñkhoñ ko phir subah raas aa.ī hai

nigāh-e-sāqī-e-rā.anā kā ye bhī ehsāñ hai
ba-qadr-e-zauq mai-e-āgahī nahīñ miltī

chhupā ke rakh diyā phir āgahī ke shīshe ko
is ā.īne meñ to chehre bigaḌte jaate the

āgahī sirf kaam aa.ī 'razā'
mere dāġh-e-junūñ ke dhone ko