Tags-Awaz

daad de zarf-e-samā.at to karam hai varna
tishnagī hai mirī āvāz kī naġhma kyā hai

koī sargoshī-numā āvāz bhī aatī nahīñ
kitnī gahrī ḳhāmushī hai lā-makāñ ke us taraf

mujhe pukāro mujhe sadā do maiñ ek khoyā huā bashar huuñ
shu.ūr meñ lā-shu.ūr kī tarah ek āvāz gūñjtī hai

merā sab le lo mujhe ek mohabbat de do
shahr meñ aisī bhī āvāz lagā kar dekhūñ

aaj is andāz se tum ne mujhe āvāz dī
yak-ba-yak mujh ko ḳhayāl aayā ki haañ maiñ bhī to huuñ

na yaad aa.e koī aur na de koī āvāz
nikal ke yādoñ kī bastī se aa gayā huuñ maiñ

ek āvāz na.ī kaan meñ gūñjī us dam
jab bhī tasvīr zamāne kī suhānī dekhī

bas isī aas meñ baiThā huuñ sar-e-sahrā maiñ
koī bādal mujhe āvāz lagātā nikle

jo bhī nikle tirī āvāz lagātā nikle
aise hālāt meñ ab ghar se koī kyā nikle

kahīñ āvāz ke parde paḌe haiñ
kahīñ chup meñ ka.ī sargoshiyāñ haiñ

koī āvāz bhī patthar nahīñ kartī thī mujhe
apne jañgal kā maiñ sultān thā tum jānte the

haath siine par na rakkho ho chukā qissa tamām
ab koī āvāz mere dil kī dhaḌkan meñ nahīñ

suntā rahtā huuñ buzurgoñ se maiñ akasr 'tāhir'
vo samā.at hī rahī aur na vo āvāz rahī

ik na.e moḌ pe us ne bhī mujhe chhoḌ diyā
jis kī āvāz meñ shāmil mirī āvāz rahī

dard ḳhāmosh rahā TūTtī āvāz rahī
merī har shaam tirī yaad kī hamrāz rahī

tū to hai husn-e-azal aur mirā rañg-e-ġhazal
merī āvāz meñ bhī kuchh to asar jaane de

terī āvāz kī parvāz meñ hai merā vajūd
apnī guftār ke pardoñ meñ bikhar jaane de

kisī ko garmi-e-taqrīr se apnī lagā rakkhā
kisī ko muñh chhupā kar narmī-e-āvāz se maarā

dil choT sahe aur uf na kare ye zabt kī manzil hai lekin
sāġhar TuuTe āvāz na ho aisā to bahut kam hotā hai

raat ik ujḌe makāñ par jā ke jab āvāz dī
guuñj uTThe bām-o-dar merī sadā ke sāmne