Tags-Tevar

ham ko Thukrā ke kuchh aise tire tevar badle
jab sar-e-bazm bhī dekhā tujhe tanhā dekhā

sar-chashma-e-vajūd ko hargiz na chheḌūñ maiñ
koyal se ik irāda-e-tevar luuñ aur gā.ūñ

ḳhud-farebī baḌh ke jab bantī hai ehsās-e-shu.ūr
jab javāñ hotā hai ahl-e-zar ke tevar meñ ġhurūr

maiñ ne bhī batāyā ki mirā hausla kyā hai
tevar to bahut tez the tūfān-e-balā ke

nafas meñ sherāna tevar aarzū rūba-mizāj
ehtiyāj o ehtiyāj o ehtiyāj o ehtiyāj!

dekhtā huuñ jo hashr ke āsār
apne tevar mulāhiza kiije

ruk ke jo sāñseñ aa.iiñ ga.iiñ maanā ki vo aaheñ thiiñ lekin
aap ne tevar kyuuñ badle aahoñ meñ kisī kā naam nahīñ

kahāñ tevar haiñ un meñ ab vo kal ke
havā chalne lagī hai ruḳh badal ke

badle badle se lagte haiñ aaj ye tere tevar kyuuñ
pahle jaise kyuuñ ab tere pyaar ke vo jazbāt nahīñ

soch meñ bhī ab nahīñ pahlā sā tevar aur loch
shauq kī dīvār gard-e-ġham se uThtī jaa.e hai

bhītar se ḳhālis jazbātī aur uupar se TheTh pitā
alag anūThā anbūjhā sā ik tevar the baabū jī

is bhuul meñ na rah ki ye jhoñke havā ke haiñ
tevar to un ke dekh zarā kis balā ke haiñ

ruḳh badal jaatā mirī taqdīr kā
aap hī tevar badal kar rah ga.e

us ke anā kī vaz.a thī sab se alag 'fazā'
kyā shaḳhs thā ki apne hī tevar se kaT gayā

zamāna kyā dekhiye dikhā.e na jaane kyā inqalāb aa.e
falak ke tevar meñ ḳhashmagīñ se zamīñ ke dil meñ ġhubār sā hai

nā-tavānī kā burā ho ham udhar ko jo chale
tivr aa aa ga.e gir gir paḌe jaayā na gayā

yūñhī kisī kī koī bandagī nahīñ kartā
butoñ ke chehroñ pe tevar ḳhudā ke rakkhe the

sukūn chehre pe har ḳhush adā ke rakkhe the
samundaroñ ne bhī tevar chhupā ke rakkhe the

har aan umañgoñ ke badalte rahe tevar
har aan mohabbat meñ na.ī raah chale haiñ