Tags-Travel

ek lamhe ke jazīre meñ qayām aisā thā
jaise anjāne zamānoñ ke safar meñ ham the

pahuñch ke jo sar-e-manzil bichhaḌ gayā mujh se
vo ham-safar thā magar ham-nazar na thā merā

baiThā huuñ duur saa.e se is vāste 'sa.īd'
āsūdgī safar kī usī imtihāñ meñ ho

kuchh log the safar meñ magar ham-zabāñ na the
hai lutf guftugū kā jo apnī zabāñ meñ ho

sarmā kī raat rail kā Dibbā udāsiyāñ
lambā safar hai aur tirā saath bhī nahīñ

safar kī mauj meñ the vaqt ke ġhubār meñ the
vo log jo abhī is qarya-e-bahār meñ the

rāh-e-vafā pe kam haiñ ḳhasāre hamāre dost
haiñ is safar ke apne sitāre hamāre dost

sochtā huuñ raat ke andhe safar ke moḌ par
chāñd ghabrāyā to hogā ḳhālī bistar dekh kar

asl safar hai vahāñ se aage
jahāñ talak rasta jaatā hai

mire nuqūsh tire zehn se miTā degā
mirā safar hī mire fāsle baḌhā degā

terā ham-zād tujhe shahr meñ milne se rahā
bāñdh le raḳht-e-safar ḳhaak uḌā sahrā kī

nashāt-e-manzil nahīñ to un ko koī sā ajr-e-safar hī de do
vo rah-navard-e-rah-e-junūñ jo pahan ke rāhoñ kī dhuul aa.e

huuñ musalsal safar meñ misl-e-havā
ḳhud-sarī merī rahnumā hai mujhe

pahuñche na yuuñ hī manzil-e-iz.hār-e-zāt tak
taht-e-shu.ūr ik safar-e-lā-shu.ūr thā

ziist safar hai tanhā.ī kā
aanā tanhā jaanā tanhā

mire saath jugnū hai ham-safar magar is sharar kī bisāt kyā
ye charāġh koī charāġh hai na jalā huā na bujhā huā

kis kī talāsh hai hameñ kis ke asar meñ haiñ
jab se chale haiñ ghar se musalsal safar meñ haiñ

sālik-e-rāh-e-vafā hai dil-e-āshufta-mizāj
muzhda-e-gumrahi-e-shauq-e-safar se pahle

duniyā simaT ke ek hī nukte meñ aa ga.ī
ham ne jab apnī zaat ke andar safar kiyā

ḳhud ham ne kaaT kaaT dī zanjīr saañs kī
ḳhud ham ne zindagī kā safar muḳhtasar kiyā