Tags-Travel

mire chaar jānib ye khiñch ga.ī hai qanāt kaisī
ye dhuāñ hai ḳhatm-e-safar kā yā TuuTe ḳhvāb sā kuchh

safar thā jab raushnī kī jānib to phir ma.āl-e-safar kā kyā ġham
charāġh kī tarah saarī shab shaan se jale sub.h bujh ga.e ham

safar ke ba.ad bhī mujh ko safar meñ rahnā hai
nazar se girnā bhī goyā ḳhabar meñ rahnā hai

duur tak ek syāhī kā bhañvar aa.egā
ḳhud meñ utroge to aisā bhī safar aa.egā

maiñ ḳhalāoñ ke safar par huuñ nikalne vaalā
chāñd sūraj mire zīnoñ se pare haT jaa.eñ

pahuñch ke jo sar-e-manzil bichhaḌ gayā mujh se
vo ham-safar thā magar ham-nazar na thā merā

jis vaqt ham ne jhuum kar azm-e-safar
lākhoñ charāġh rāh-e-mohabbat meñ jal ga.e

ai mire saa.e milā hai jab se tujh sā ham-safar
rāste kī har musībat rāstā bantī huī

javāñ hoñ hausle jis ke vo mere saath chale
kaḌaktī dhuup meñ sahrā kā hai safar mujh ko

dhuāñ sifat huuñ ḳhalāoñ kā hai safar mujh ko
uḌā rahī haiñ havā.eñ idhar udhar mujh ko

maiñ kitne rañgoñ meñ Dhaltā kab tak ḳhud se laḌ paatā
jīvan ek safar thā jis ne roz nayā ik moḌ liyā

ḳhatm hogā ab safar pesh-e-nazar hai rū-e-dost
aa rahī hai aaj kī manzil se mujh ko bū-e-dost

vo māhtāb hai, maiñ jhiil aur safar darpesh
vo mujh se hotā huā paar ho gayā to phir,

rukāvaTeñ to safar kā javāz hotī haiñ
ye rāsta kahīñ hamvār ho gayā to phir!

safar vafā kā adhūrā adhūrā hai jaan lo 'nāyāb'
ki jab talak na dil-o-jāñ lahū lahū ho leñ

rahbar badal ga.e kabhī rahzan badal ga.e
aur ham-safar bhī koī purānā nahīñ rahā

abhī qasd-e-safar kā qissa kaisā
abhī rāhoñ meñ āsānī bahut hai

musalsal ek hī tasvīr chashm-e-tar meñ rahī
charāġh bujh bhī gayā raushnī safar meñ rahī

bīmār huuñ bañdhī hai dhun rāt-din safar kī
ġhurbat meñ apnī miTTī hogī ḳharāb shāyad

ek dil thā so huā hai pā.emāl-e-ārzū
ab na koī rahnumā hai aur na koī ham-safar