Tags-Travel

safar kuchh aur bhī mushkil se kaTtā
agar ye rāsta hamvār hotā

kahīñ ruke to na phir tum ko rāsta degī
ye zindagī bhī safar hai qayām mat karnā

hākim-e-vaqt ye hijrat mujhe manzūr magar
dam-e-ruḳhsat mujhe sāmān-e-safar bhī denā

maiñ jāntā huuñ magar dil ko kaun samjhā.e
'shanās' us ko mirā ham-safar nahīñ rahnā

ġhalat ki koī sharīk-e-safar nahīñ 'aslam'
sulagte aks haiñ jalte hue ishāre haiñ

hadd-e-nazar tak raat hī raat
aisā safar aur terā saat

safar ke laakh hiile haiñ
ye dariyā to vasīle haiñ

dekhne meñ yuuñ ba-zāhir sab hamāre saath the
jab saroñ par dhuup aa.ī ham-safar koī na thā

is safar meñ niiñd aisī kho ga.ī
ham na so.e raat thak kar so ga.ī

tai havā kaise añdheroñ ke samundar kā safar
ġhāza-e-sub.h se kyā chādar-e-shab se pūchho

raḳht-e-safar bhī hogā mire saath shahr meñ
sahrā bhī shauq-e-naql-e-makānī meñ aa.egā

hazāroñ saal safar kar ke phir vahīñ pahuñche
bahut zamāna huā thā hameñ zamīñ se chale

is safar meñ go tamāzat to bahut thī hijr kī
maiñ tirī yādoñ kī chhāñv sar pe le kar aa gayā

pukārte the barābar mujhe safar ke liye
matā-e-ḳhvāb savāroñ meñ baañT dī maiñ ne

safar kahāñ se kahāñ tak pahuñch gayā merā
ruke jo paañv to kāñdhoñ pe jā rahā huuñ maiñ

apnā zād-e-safar bhī chhoḌ ga.e
jaane vāloñ ne kitnī ujlat kī

itne moḌ safar meñ dekh chukā huuñ 'shāz'
mere ḳhayāloñ meñ bal aa bhī saktā hai

ik be-nām sī khoj hai dil ko jis ke asar meñ rahte haiñ
ham kāġhaz kī naav banā kar roz safar meñ rahte haiñ

ye aur baat ki manzil-fareb thā lekin
hunar vo jāntā thā ham-safar banāne kā

maiñ apne pīchhe sitāroñ ko chhoḌ aayā huuñ
mujhe dimāġh nahīñ ham-safar banāne kā