Tags-Travel

jaane kis jurm kī paa.ī hai sazā pairoñ ne
ik safar ḳhatm pe hai aglā safar aa gayā hai

ham-safar jab bhī ho nigār-e-ġhazal
ravish-e-ḳhās iḳhtiyār karo

thakan safar kī badan shal sā kar ga.ī hai 'munīr'
burā kiyā jo safar meñ qayām kar baiThā

dekhā jinhoñ ne aañkh gañvā kar safar kiyā
be-laus jo chale the vahī tujh ko pā ga.e

dasht-e-majnūñ na sahī tesha-e-farhād sahī
safar-e-ishq meñ vāmāndgiyāñ ek sī haiñ

umr-safar jaarī hai bas ye khel dekhne ko
ruuh badan kā bojh kahāñ tak kab tak Dhotī hai

'chāñd' kā mushkil safar kaise likhūñ
aap ḳhud pairoñ pe chal kar dekhnā

gumāñ hai sab ko ki huuñ āsmāñ uThā.e hue
safar safar vo qadam kā ġhubār sar par hai

ab to ye safar apnā āsmāñ se aage hai
marhala haqīqat kā ab gumāñ se aage hai

haiñ bahut se aise bhī rāhzan jo mileñge ḳhizr ke bhes meñ
koī un se kah de ye ham-safar jinheñ rāhbar kī talāsh hai

dasht-e-imkān meñ tanhā maiñ kahāñ tak jaatā
jab gumāñ bhī na rahā tark safar kar aayā

'farāsat' ahl-e-jahāñ ham-safar haiñ ḳhushiyoñ ke
maqām-e-rañj talak kab kasū ke saath aa.e

zindagī ke is safar meñ tajraba ham ko huā
saath sab haiñ par kabhī pahchāntā koī nahīñ

tū mujhe raah meñ kyā milā
ik javāz-e-safar mil gayā

idhar kī aa.egī ik rau udhar kī aa.egī
ki mere saath to miTTī safar kī aa.egī

kuchh aur moḌ guzarne kī der hai baanī
sadā na gard kisī ham-safar kī aa.egī

ajnabī rāheñ na jaane kis tarah āvāz deñ
jab safar par chal paḌe the kis liye sochā na thā

ujāle Duube hue haiñ ghane añdheroñ meñ
ajab safar hai bahut yaad aa rahe haiñ charāġh