Tags-Travel

is liye tanhā huuñ maiñ garm-e-safar
qāfile meñ rahnumā maujūd hai

tū chāñd hai maiñ chāñd kā anjām-e-safar huuñ
āñkhoñ meñ tirī duur kahīñ Duub gayā huuñ

bas darīche se lage baiThe rahe ahl-e-safar
sabza jaltā rahā aur yād-e-vatan aatī rahī

phir tirā shahr tirī rāhguzar ho ki na ho
aur ho bhī to mujhe shauq-e-safar ho ki na ho

sar-e-ḳhār se sar-e-sañg se jo hai merā jism lahū lahū
kabhī tū bhī to mire sañg-e-mīl kabhī rañg mere safar ke dekh

maiñ ālam-e-tanhā.ī meñ niklā huuñ safar par
phir gardish-e-ayyām kahīñ saath na ho le

thā izitrāb-o-tamannā-e-dīd gul kā karam
bahut kaThin thā safar varna ḳhārzāroñ kā

khīñch kar mujh ko har ik naqsh-o-nishāñ le jaa.e
kyā pata zauq-e-safar merā kahāñ le jaa.e

safar-e-ishq meñ kī zo.af ne rāhat-talabī
har qadam saa.e ko maiñ apne shabistāñ samjhā

maiñ be-tarah ke ka.ī giit gungunātā huuñ
safar meñ jaise koī sārbān boltā hai

safar bhī koī na ho rahguzar bhī koī na ho
hamāre ba.ad ḳharāb is qadar bhī koī na ho

likh rahī hai sahar ke māthe par
raat apne safar kā sannāTā

kis ko āvāz de musāfir-e-ġham
be-jahat hai safar kā sannāTā

Thahrāv kisī shai ke muqaddar meñ nahīñ hai
duniyā hai vo jaada jise kahiye safar-ābād

ajab musāfir huuñ maiñ merā safar ajiib
merī manzil aur hai merā rasta aur

savād-e-shab ke safar meñ sitāra-vār chalūñ
tire jamāl kī lau merī ham-rikāb to ho

safar ke ba.ad rahte haiñ tasalsul meñ safar ke ham
talāsh-e-rizq kā jazba shikasta par meñ rakhte haiñ

agar vo ham-safar Thahreñ to ham ko Dar meñ rakhte haiñ
bikhar jaa.eñ na ham ḳhud ko muqayyad ghar meñ rakhte haiñ

-āsāñ nahīñ hai kashmakash-e-zāt kā safar
hai āgahī ke ba.ad ġham-e-āgahī bahut

husn us kā usī maqām pe hai
ye musāfir safar nahīñ kartā