Tags-Travel

ye jahānoñ kā zamānoñ kā makānoñ kā safar
ġhaib ne lafz se yā ma.anī se āġhāz kiyā

maiñ jo kahtā thā so ai rahbar-e-kotāh-ḳhirām
terī manzil bhī mirī gard-e-safar hai ki nahīñ

phir ujāle se safar hogā andhere kī taraf
jab utāreñge badan se umr-e-fānī kā libās

batā.ūñ kyā tumheñ hāsil safar kā
adhūrī dāstāñ hai aur maiñ huuñ

mirī rafīq-e-safar thiiñ hasad bharī nazreñ
vo āsmān thā aur mere iḳhtiyār meñ thā

na kar sakā kisī manzil kā ehtirām ki maiñ
junūn-e-shauq kā maarā safar kī qaid meñ thā

na jaane kab se maiñ gard-e-safar kī qaid meñ thā
ki sañg-e-mīl thā aur rah-guzar kī qaid meñ thā

ik sadā mere kānoñ meñ aatī rahī ik balā naam le kar bulātī rahī
muḌ ke dekhā na maiñ ne kabhī kabhī maiñ jau jo safar kiyā be-ḳhatar kar liyā

jis ghaḌī rāh-e-pur-ḳhār maiñ ne chunī saath us ne bhī azm-e-safar kar liyā
sub.h sūraj nikalne se pahle chale, jis jagah ho ga.ī raat ghar kar liyā

agle paḌāv par yūñhī ḳhema lagāoge
jitnī bhī hai safar kī thakan bhuul jāoge

na koī naqsh-e-qadam hai na koī gard-e-safar
duur tak raah nazar aa.ī hai sunsān mujhe

is rāh-e-mohabbat meñ tū saath agar hotā
har gaam pe gul khilte ḳhushbū kā safar hotā

imkān-e-vajūd ke safar par
nikle to muhāl ho ga.e ham

ye kaisā kārvāñ hai ki ek ek gaam par
sab sochte haiñ kyā koī mauqa.a safar kā hai

ġhurūr saath meñ chaltā hai har ghaḌī us ke
vo ab amiir hai tanhā safar nahīñ kartā

jahāñ se ma.adūm thī ḳhush-ā.indagī safar kī
vahīñ se ik lamha-e-tag-o-tāz ham hue the

vo raat kā tūl-tavīl safar kyā kahiye kaise aa.ī sahar
kuchh maiñ ne qissa chheḌā thā kuchh us ne aas bañdhā.ī thī

ik manzil-e-be-maqsad o be-nām kī ḳhvāhish
kāñToñ kī savārī pe safar le ke ga.ī hai

hāsil-e-kunj-e-qafas vahm-ba-kaf tanhā.ī
raunaq-e-shām-e-safar tā-ba-sahar sannāTā

dasht-e-hastī meñ shab-e-ġham kī sahar karne ko
hijr vāloñ ne liyā raḳht-e-safar sannāTā