Tags-Travel

vo mere saath safar meñ to chalne vaalā hai
kahīñ vo chupke se rasta badalne vaalā hai

ḳhayāl-o-ḳhvāb kī ab rahguzar meñ rahtā hai
ajiib shaḳhs hai aksar safar meñ rahtā hai

kabhī merī talab kachche ghaḌe par paar utartī hai
kabhī mahfūz kashtī meñ safar karne se Dartā huuñ

jab safar se lauT kar aane kī tayyārī huī
be-ta.alluq thī jo shai vo bhī bahut pyārī huī

bhuul jaate haiñ tire chāhne vaale tujh ko
is qadar saḳht ye hastī kā safar hotā hai

ḳhud ko kisī kī rāhguzar kis liye kareñ
tū ham-safar nahīñ to safar kis liye kareñ

safar uljhā diye haiñ us ne saare
mire pairoñ meñ jo tezī paḌī hai

mire shauq-e-sair-o-safar ko ab na.e ik jahāñ kī numūd kar
tire bahr o bar ko to rakh diyā hai kabhī kā maiñ ne khañgāl ke

tum pe ilzām na aa jaa.e safar meñ koī
rāsta kitnā hī dushvār ho Thahrā na karo

ham agar sach ko zabānoñ pe sajā kar rakkheñ
phir safar ziist kā dushvār nahīñ rah saktā

rāh-e-talab meñ dūrī-e-manzil kā ġham nahīñ
ma.alūm ho chukā hai ma.āl-e-safar mujhe

lab pe fariyād na hai aañkh meñ qatra koī
vādi-e-shab meñ nahīñ ham-safar apnā koī

is safar pe huuñ ki halkān huā jaatā huuñ
aur kahāñ jaanā hai ye bhī nahīñ batlā saktā

ho rā.egāñ har safar to 'anjum' tamām raste haiñ ek jaise
na manzileñ jab nasīb meñ hoñ masāfateñ kyā shumār karnā

jo chand sikkoñ kī chaah meñ kiiñ vo hijrateñ kyā shumār karnā
safar meñ apnoñ se dūriyoñ kī aziyyateñ kyā shumār karnā

safar ke shauq meñ itne azaab jhele haiñ
ki ab to qasd-e-safar hī se Dar ga.e haiñ log

ye ishq marhala to safar-dar-safar kā hai
ab dekhnā hai kis ne kahāñ tak safar kiyā

ye safar vo hai jahāñ saañs ke par jalte haiñ
tujh ko zid hai to phir ai hasti-e-bekār chal aa

ham apne zauq-e-safar ko safar sitārā kareñ
na koī zā.icha khīñcheñ na istiḳhāra kareñ

jo mere bas meñ hai us se ziyāda kyā karnā
safar to karnā hai us kā irāda kyā karnā