Tags-Ummeed

bujhā diye haiñ ḳhud apne hāthoñ mohabbatoñ ke diye jalā ke
mirī vafā ne ujaaḌ dī haiñ umiid kī bastiyāñ basā ke

dil-e-hazīñ ko karam kī umiid karne de
abhī use tirī majbūriyāñ nahīñ ma.alūm

aa.e charāġh shaam lagā luuñ gale tujhe
donoñ ko ye umiid nahīñ hai sahar mile

itnī ummīd to hai apne pisar se mujh ko
merī turbat pe jalā.egā diyā mere ba.ad

ummīd bhī kabhī kabhī naumīdī hai mujhe
dikhlātī rañg hai shab-e-hijrāñ na.e na.e

koī ummīd bar nahīñ aatī
koī sūrat nazar nahīñ aatī

ummīd-o-bīm, ishrat-o-usrat ke darmiyāñ
ik kashmakash kuchh aur thii, kuchh thā kuchh aur thā

shāyad usī ke dam se hai qaa.em ummīd-e-zīst
ik jāñ-faroz sham-e-farozāñ nazar meñ hai

ummīd us ke rahm-o-karam kī bhī rakh zarūr
dāman ko apne ashk-e-nadāmat se tar bhī rakh

ek ummīd-e-vasl hai lekin
ek ummīd pe guzar kab tak

bāzār-e-bosa tez se hai tez-tar 'zafar'
ummīd to nahīñ ki ye mahñgā.ī ḳhatm ho

apne bīmār kī ye āḳhirī ummīd bhī dekh
malak-ul-maut se kahtā hai masīhā.ī kar

kin daraḳhtoñ se lagā rakkhī hai ummīd-e-samar
shāḳh hī jab na ho sarsabz to phal kaise ho

kis se 'azīz' rakkhūñ ummīd dostī kī
sarkash hai nafs jab tak apnā hī maiñ adū huuñ

yūñhī to nahīñ baiTh ga.e jhaaḌ ke dāman
mahrūmī-e-taqdīr se ummīd baḌī hai

siyāsī logoñ se ummīd kaisī ḳhāk-e-vatan
vatan kā qarz kahīñ rāhzan utārte haiñ

bhaTke hue ḳhayāl kī sūrat use mile
bhūlā huā umiid kā rastā samajh liyā

jalā.e rakkhā hai maiñ ne bhī ik charāġh-e-umīd
tumhārā dar bhī muqaffal nahīñ huā ab tak

ab to ye armān hai armān hī paidā na hoñ
go samajhtā huuñ ki ye ummīd bhī mauhūm hai

hoñge manzil se ham-āġhosh ye ummīd bañdhī
rāste meñ koī patthar nahīñ aayā ab tak