Tags-Ummeed

na baaz rakh ham ko rone se tū gireñ jo ashkoñ ke daane bahattar
ye kisht-e-hasrat meñ apnī hamdam umiid kā tuḳhm bo rahe haiñ

kisī se bas ki umīd-e-kushūd-e-kār nahīñ
mujhe ajal ke bhī aane kā e'tibār nahīñ

kuchh apnī vafāoñ se jo ummīd thī ham ko
kuchh un kī nigāhoñ ke sahāre bhī mile haiñ

is Dūbte sūraj se to ummīd hī kyā thī
hañs hañs ke sitāroñ ne bhī dil toḌ diyā hai

rag rag meñ dil kī jazb hai mahshar-e-umīd
andāza-e-hujūm-e-tamanna kare koī

rahā karam jo tumhārā to bahr-e-hastī se
ham apnī kashtī-e-ummīd paar kar leñge

zindagī kahtī hai armāñ koī ab hai na ummīd
kab talak saath karūñ maiñ tan-e-tanhā terā

ujāloñ se to ab 'afrañg' kyā ummīd kījegā
magar ye tīrgī ham se ḳhafā achchhī nahīñ lagtī

is ke bā-vasf ki har samt añdherā hai muhīt
ham haiñ vo log jo ummīd-e-sahar rakhte haiñ

hamāre sar pe ye aksar ġhazab hotā hī rahtā hai
lahū ummīd kā ham se talab hotā hī rahtā hai

ġharaz na rakkhe mai-e-jahāñ se to ham bhī qaa.il hoñ tere vaa.iz
kamāl kyā jab ummīd-e-fardā hī illat-e-pāk-dāmanī hai

kabhī to aa mere rashk-e-īsā huī hai muzmin tap-e-judā.ī
nahīñ shifā kī ummīd baaqī numūd chehre se murdanī hai

samjhī hai jis ko sāya-e-ummīd aql-e-ḳhām
'sāġhar' kā hai ḳhayāl baḌī tez dhuup hai

udhar barq-e-nigah hai sabr ke ḳhirman kī ātish-zan
idhar kisht-e-ummīd-o-yās ab tak sair-e-hāsil hai

us anjuman meñ jā.iye ab kis umiid par
ham baiThne na paa.e ki vo bad-gumāñ uThā

jab ye chhaT jā.eñge bādal to kiran phūTegī
sham.a ummīd kī ik ham bhī jalā.e rakkheñ

jab shāḳh-e-tamannā pe koī phuul khilā hai
ummīd ke sahrāoñ meñ tūfān uThā hai

mujh se us ko rahī talāsh-e-umīd
so bahut din chhupā rahā mujh meñ

roz-e-jazā ummīd hai sab ko sazā mile
iqdām-e-qatl meñ haiñ mire sab hasīñ sharīk

lahū se harf tarāsheñ jo merī tarah ummīd
unhīñ ke hisse meñ zaḳhm-e-hunar bhī aatā hai