Tags-Ummeed

chāñd tāroñ ne bhī jab raḳht-e-safar kholā hai
ham ne har sub.h ik ummīd pe dar kholā hai

na.ī umiid na.e rāste talāsh karo
hamesha marsiya gaane se kuchh nahīñ hogā

dushman kī baat jab tirī mahfil meñ rah ga.ī
ummīd yaas ban ke mire dil meñ rah ga.ī

azal se us kā hī aasrā hai jo dene vaalā murādoñ kā hai
barā.e-fil-faur umīd-e-dil ko jo chūmne us ke dar ko chaliye

gum ho ga.ī ummīd-e-mulāqāt sahar meñ
ye tū ne mire saath ajab chaal chalī raat

ahl-e-dil zinda haiñ kis ummīd par
nazm-e-duniyā hai nizām-e-ārzū

zālim
jashn hai mātam-e-ummīd kā aao logo

dil ek sadiyoñ purānā udaas mandir hai
umiid tarsā huā pyaar dev-dāsī kā

ma.alūm hai ki kuchh bhī nahīñ dasht-e-zīst meñ
ummīd-e-ḳhvāb hī pe guzārā to hai abhī

bahut ummīd thī is zindagī se
magar ummīd ye murjhā rahī hai

yuuñ hī ḳhush karte haiñ dil apnā umīd-e-vasl meñ
khīñchte haiñ ek jā apnī tirī tasvīr ham

koī ummīd na bar aa.ī shakebā.ī kī
is ne bātoñ meñ bahut hāshiya-ārā.ī kī

dast-e-qātil se kuchh ummīd-e-shafā thī lekin
nok-e-ḳhanjar se bhī kāñTā na gulū kā niklā

vasl o firāq o hasrat o ummīd se khulā
hamrāh hai har ek baqā ke fanā ġharaz

aaj bhī jin ko hai apnoñ se vafā kī ummīd
merī tasvīr unheñ jā ke dikhā de koī

mo.ajiza us ko hī kahtī hai ye duniyā shāyad
mujh ko ummīd na thī par vo palaT aayā hai

nahīñ kotāh dāman-e-ummīd
aage ab dast-e-nā-rasā jaane

jhūTī ummīd dilāne se to behtar hai 'qamar'
vahī TuuTā huā va.ada mujhe vāpas kar de

umiid kyā charḳh-e-sifla-parvar hameñ ho ab tujh se ek naañ kī
ki tere hāthoñ se māh-e-nau ne yahāñ qanā.at kī niim naañ par

maiñ charāġh-e-hasrat-e-nīm-shab meñ sharār-e-ātish-e-jāñ-ba-lab
dil-e-pur-umīd kī lau thā maiñ mujhe ḳhud vo aa ke bujhā gayā