Tags-Visaal

hijr o visāl charāġh haiñ donoñ tanhā.ī ke tāqoñ meñ
akasr donoñ gul rahte haiñ aur jalā kartā huuñ maiñ

mujhe bhī vahshat-e-sahrā pukār maiñ bhī huuñ
tire visāl kā ummīd-vār maiñ bhī huuñ

maiñ zabt kar nahīñ saktā sar-e-furāt-e-visāl
kī tishnagī mire saare usuul chaaT ga.ī

havā-e-hijr abhī tak hai mahv-e-ḳhvāb kahīñ
fasīl-e-jāñ pe charāġh-e-visāl jalte raheñ

tirā visāl baḌī chiiz hai magar ai dost
visāl ko mirī duniyā-e-ārzū na banā

shauq-e-visāl thā bahut so hai visāl hī visāl
hijr ke rañg ab kahāñ mausam-e-ġham badal ga.e

tū paas thā to rahe mahv dekhne meñ tujhe
visāl ko bhī tire hijr par uThā rakkhā

shab-e-visāl vo kis naaz se ye kahte haiñ
hamāre hijr meñ sach-much tujhe qarār na thā

lāchuk, nasīm-e-sub.h, payām-e-visāl-e-dost
kab tak misāl-e-sham.a rag-e-jāñ jalā.ūñ maiñ

ajiib haal hai betābī-e-mohabbat kā
shab-e-visāl kī rāhat meñ DhūñDtī hai qarār

tire visāl kī ḳhushbū bhī sirf merī hai
tire baġhair guzārā bhī maiñ hī kartā huuñ

marham tire visāl kā lāzim hai ai sanam
dil meñ lagī hai hijr kī barchhī kī huul aaj

hijr kī shab thī kyā ġhazab had ke sahe ġham-o-ta.ab
sub.h-e-visāl aa.ī ab jaan bachī balā Talī

visāl terā ḳhayāl terā jo ho to kyūñkar na ho to kyūñkar
na tujh pe kuchh iḳhtiyār dil kā na dil pe kuchh iḳhtiyār merā

ik aur vasl-e-suḳhan aur ik visāl-e-nigāh
mufārqat kī ghaḌī merī jaan! sar par hai

ḳhush huuñ chup rahne se un ke dam-e-paiġhām-e-visāl
ki ye inkār to kuchh shāmil-e-iqrār rahā

ye gum hue haiñ ḳhayāl-e-visāl-e-jānāñ meñ
ki ghar meñ phirte haiñ ham apnī justujū karte

kyā lutf-e-intizār jo tū hīla-jū na ho
kis kaam kā visāl agar aarzū na ho

yaad unheñ vāda-e-visāl nahīñ
kab kiyā thā yahī ḳhayāl nahīñ

yahī fasāna rahā hai junūñ ke sahrā meñ
kabhī firāq ke qisse kabhī visāl kī baat