Tags-Visaal

alag alag hī raheñge dam-e-visāl bhī ham
maiñ apne man pe fidā huuñ na merā man mujh par

ḳhushbū tire visāl kī phailī hai chaar sū
kin kin jag.hoñ pe tū ne Thikāne banā.e haiñ

muddateñ guzrīñ visāl-e-yār ko
merī nazroñ meñ abhī kī baat hai

kahīñ mohabbat ke āsmāñ par visāl kā chāñd Dhal rahā hai
charāġh ke saath tāqche meñ gulāb kā phuul jal rahā hai

ab is tarah bhī na yādoñ kī kirchiyāñ chuniye
na thā firāq se behtar visāl kyā us kā

ridā-e-shab pe na.e tarz se visāl likhā
bichhaḌne vāloñ ne ik dūsre se bāteñ kiiñ

yā-rab shab-e-visāl ye kaisā gajar bajā
agle pahar ke saath hī pichhlā pahar bajā

ajiib aadat hai be-sabab intizār karnā
shab-e-alam meñ visāl ke din shumār karnā

ahd-e-visāl-e-yār kī tujh meñ nihāñ haiñ dhaḌkaneñ
mauja-e-ḳhūn-e-ehtiyāt ḳhud ko uchhāl bhī nahīñ

hindostān sāya-e-gul pā-e-taḳht thā
jāh-o-jalāl-e-ahd-e-visāl-e-butāñ na pūchh

kuchh nasha to thā visāl-e-yār meñ
umr-bhar kī jo ḳhumārī ho gayā

bad-qismatoñ ko gar ho mayassar shab-e-visāl
sūraj ġhurūb hote hī zāhir ho nūr-e-sub.h

gar bahā-e-ḳhūn-e-āshiq hai visāl
intiqām-e-zahmat-e-jallād kyā

kabhī to miltī thī hijr-o-visāl meñ lazzat
magar bujhī huī dil meñ vo soz-o-sāz kahāñ

kuchh to khiñchī khiñchī sī thī saa.at visāl kī
kuchh yuuñ bhī fāsle pe mujhe rakh diyā gayā

na vo visāl ke qisse na hijr kā ronā
baḌā ajiib sā kuchh din se haal hai apnā

maiñ huuñ nā-āshnā-e-vasl hunūz
mujh se kaif-e-visāl-e-yār na pūchh

visāl kī sarhadoñ tak aa kar jamāl terā palaT gayā hai
vo rañg tū ne mirī nigāhoñ pe jo bikherā palaT gayā hai

ham lutf-e-sair-e-bāg-e-jahāñ ḳhaak uḌā chale
shauq-e-visāl dil meñ liye yaar kā chale

suḳhan meñ rañg tumhāre ḳhayāl hī ke to haiñ
ye sab karishme havā-e-visāl hī ke to haiñ