Tags-Visaal

vo ḳhvāb thā ki khulā thā darīcha-e-shab-e-hijr
tire visāl kī ḳhushbū makāñ meñ phail ga.ī

marg-e-shām-e-visāl-e-hirmāñ hai
sub.h-dam jāñ-nisār honā thā

shah suuñ paayā hai jab visāl 'alīm'
fauj-e-ushshāq meñ tabal baajā

ham to Tuk dekhte rahe us ko
rā.egāñ lamha-e-visāl huā

visāl lamhoñ kā goshvāra alag se likkhā hai diary meñ
alag se furqat kī bebasī ke hisāb rakkhe hue haiñ ghar meñ

ab ham visāl-e-yār se be-zār haiñ bahut
dil kā jhukāv hijr kī jānib balā kā hai

sochoñ pe naqsh haiñ vo jo pal the visāl ke
dukh hijr ke tamām hī lamhoñ pe bojh haiñ

zāhid kisī visāl-e-sanam kī havas nahīñ
patthar kā but hai tū ki tujhe hiss-o-mas nahīñ

visāl-e-yār tamannā-e-ḳhām hai shāyad
ye daur-e-hijr abhī nā-tamām hai shāyad

sub.h-e-ishrat hai vo na shām-e-visāl
haa.e kyā ho gayā zamāne ko

na us kā ant hai koī na isti.āra hai
ye dāstān hai hijr-o-visāl se bāhar

zarā visāl ke ba.ad aa.ina to dekh ai dost
tire jamāl kī doshīzgī nikhar aa.ī

mire savāl-e-visāl par tum nazar jhukā kar khaḌe hue ho
tumhīñ batāo ye baat kyā hai savāl puurā javāb aadhā

kiyā hai us ne har ik se visāl kā va.ada
is ishtiyāq meñ marnā zarūrī hotā hai

zabān roko bahak rahe ho surūr-e-do-shīna josh par hai
mai-e-visāl-e-shab-e-tamannā har ek lab se abhī baham hai

tūl-e-shab-e-visāl ho misl-e-shab-e-firāq
nikle na āftāb ilāhī sahar na ho

mahāz-e-ishq pe qurbat kī jañg laḌte hue
maiñ furqatoñ ke mumāsil visāl rakhtī huuñ

hone ko hai tulū sabāh-e-shab-e-visāl
bujhne ko hai charāġh-e-shabistān-e-ārzū!

shab-e-visāl meñ bhī merī jaan ko ārām
azīzo dard-e-judā.ī ke Dar se kuchh na huā