Tags-Visaal

mānind-e-aks dekhā use aur na mil sake
kis rū se phir kaheñge ki roz-e-visāl thā

ham se judā hue to kyā ham se judā na rah sake
ā.īna firāq ko aks-e-visāl de ga.e

vo fāsle haiñ ki āñkhoñ meñ ḳhvāb nāchte haiñ
milī firāq meñ bhī lazzat-e-visāl mujhe

kahāñ ke ishq-o-mohabbat kidhar ke hijr o visāl
abhī to log taraste haiñ zindagī ke liye

kabhī to aa ki ho raushan charāġh-e-shām-e-visāl
mirā bhī ghar nazar aa.e kabhī to ghar kī tarah

sun! hijr aur visāl kā jaadū kahāñ gayā
maiñ to kahīñ nahīñ thā magar tū kahāñ gayā

ye ham jo hijr meñ us kā ḳhayāl bāñdhte haiñ
havā kī shāḳh se bū-e-visāl bāñdhte haiñ

ik ḳhalish sī rahī kahīñ dil meñ
hijr jab bhī visāl tak pahuñchā

yūñhī aatī jā.egī shām-e-visāl
yūñhī sham-e-bazm jaltī jā.egī

bas ek lamha tire vasl kā mayassar ho
aur us visāl ke lamhe ko dā.imī kiyā jaa.e

hijr se kam na thī visāl kī rut
aa.ī bechain sī guzar bhī ga.ī

is ek hijr ne milvā diyā visāl se bhī
ki tū gayā to mohabbat ko aam maiñ ne kiyā

kahāñ kā lams, kahāñ kī havas, kahāñ kā visāl
taḌap rahā huuñ tirī hamdamī kī ḳhātir yaar!

aa.ī shab-e-visāl to niiñd aa ga.ī unheñ
ham hosh meñ jo aa.e vo mad.hosh ho ga.e

faroġh-e-zaḳhm se raushan rakhā siyāhī ko
atā-e-hijr ko najm-e-visāl ham ne kiyā

jahāñ bhī dekhā vahīñ paayā tujh ko jān-e-visāl
tirī nigāh kā partav kahāñ kahāñ na milā

ye sach nahīñ hai ki chhuTne ke ba.ad jān-e-visāl
tujhe zamīñ na milī mujh ko āsmāñ na milā

nāla-e-sub.h ke baġhair giriya-e-shām ke baġhair
hotā nahīñ visāl-e-yār soz-e-davām ke baġhair

na vo kaif-e-shab na vo māh-e-shab na vo kārvān-e-ġhazāl-e-shab
jahāñ zikr-e-hijr-o-visāl thā vo varaq hī koī ulaT gayā

dil ke qarīb hijr kī rut ḳhema-zan huī
tahniyyat-e-visāl tumheñ kaun de gayā