Tags-Visaal

ye ek umr purānī sharāb hai yaaro
ḳhumār-e-hijr rahegā visāl kar ke bhī

kyā hijr kyā visāl vahī āshiqoñ kā haal
āḳhir qarār meñ bhī bechārā koī to ho

'zafar' ye hai us but kī yādoñ kā sadqa
shab-e-hijr lutf-e-visāl aa rahā hai

hai sā.at-e-visāl ke malne pe munhasir
kas samt bhāgtā huuñ ye lamha uThā ke maiñ

tamīz-e-hijr-o-visāl is maqām par bhī hai
hisāb-e-rāh-e-mohabbat meñ garche haal meñ haiñ

koī bhī paas nahīñ to tirā ḳhayāl na ġham
ba-qaul-e-pīr-e-jahāñ-dīda ham visāl meñ haiñ

ḳhizāñ meñ hijr kī Duubā visāl kā mausam
magar hai zehn meñ ḳhushbū sī raat raanī kī

visāl-ghaḌiyoñ meñ reza reza bikhar rahe haiñ
ye kaisī rut hai ye kin azāboñ ke silsile haiñ

safar meñ rakh mujhe merī judā.iyoñ se parakh
firāq de abhī ḳhāk-e-visāl meñ na milā

qat.a jab se huī ummīd-e-visāl-e-jānāñ
is tarah baiTh gayā dil ki uThāyā na gayā

hijr kī shab ko yaañ ta.iiñ taḌpā
ki huā sub.h hote merā visāl

maiñ huuñ 'bāqar' aise maqām par nahīñ kam-nazar kā jahāñ guzar
ye ajiib manzil-e-shauq hai ki na hijr hai na visāl hai

sab lazzateñ visāl kī bekār karte ho
kyuuñ baar baar niiñd se bedār karte ho

sar-e-visāl tire kaif-o-kam se zāhir haiñ
mirī nazar pe kaf-e-kūza-gar ke kyā kyā rañg

maiñ apne hijr meñ thā mubtalā azal se magar
tire visāl ne mujh se milā diyā hai mujhe

dil-e-mahjūr meñ armān-e-visāl
na sahī diid kī hasrat hī sahī

shikan-andar-shikan yaad aa gayā hai
visāl-e-tishna-tan yaad aa gayā hai

dil se aaheñ chal chukī haiñ ho gayā mumkin visāl
ab laboñ tak aa nahīñ saktīñ asar ke bojh se

tasavvur meñ visāl-e-yār ke sāmān hote haiñ
hameñ bhī yaad haiñ hasrat kī bazm-ārā.īyāñ kyā-kyā

jitne haiñ duur utne hī dil ke qarīb haiñ
ham ko to daur-e-hijr bhī daur-e-visāl hai