Tags-Visaal

amīr-e-vahshiyān-e-ishq huuñ so tū
zarā sī dekh-bhāl kar visāl kar

ḳhudā kā hijr asl meñ visāl hai
so is meñ intiqāl kar visāl kar

lahū ko chulluoñ meñ le ke yuuñ uḌā
badan pe rañg Daal kar visāl kar

visāl-e-yār gar harām hai to sun
harām ko halāl kar visāl kar

vajūd-e-jism-e-jāñ se istifāda kar
zarā samay nikāl kar visāl kar

shab-e-visāl thī raushan fazā meñ baiThā thā
maiñ tere sāya-e-lutf-o-atā meñ baiThā thā

kabhī tumhāre qarīb rah kar bhī dūriyoñ ke azaab jheleñ
kabhī kabhī ye tumhārī furqat bhī ham ko lutf-e-visāl de de

kisī ke hijr kā chhallā kisī visāl kī chhāp
bichhaḌ ke mujh se tujhe kyā milā dikhā to sahī

safar kī dhuup ne chehra ujaal rakkhā thā
vo mar gayā to sirhāne visāl rakkhā thā

visāl jab nahīñ mumkin to dil pe jabr achchhā
vo kyā kare jise dil hī par iḳhtiyār na ho

ye kyā fusūñ hai ki sub.h-e-gurez kā pahlū
shab-e-visāl tirī baat baat se niklā

na rahī be-ḳhudi-e-shauq meñ itnī bhī ḳhabar
hijr achchhā hai ki 'mahrūm' visāl achchhā hai

mirā dil dahalne lagā abhī do ghaḌī tū duur hai ham-nashīñ
ḳhabar-e-visāl nahīñ sunī ye mirī qazā kā payām hai

shām-e-visāl se ho kyā mahv-e-fareb-e-ārzū
yaad nahīñ rahī hameñ sub.h-e-vidā-e-yār kyā

hai jāgne pe hī paḌtā tamām chābuk-e-hijr
hoñ āñkheñ band to saarā samāñ visāl kā hai

ajab tazād ke pesh-e-nazar huuñ hastī meñ
hai dhuup hijr kī aur sā.ebāñ visāl kā hai

ham aise farq-e-ta.alluq se ḳhud bhī hairāñ haiñ
zamīñ hai hijr kī aur āsmāñ visāl kā hai

kashīd karte haiñ irfān apne hijr se 'tūr'
ye ḳhitta chhoḌ ke saarā jahāñ visāl kā hai

kitāb-e-ishq meñ saarā bayāñ visāl kā hai
maiñ zinda hijr meñ huuñ aur gumāñ visāl kā hai

ġharaz se chup haiñ magar ahl-e-dil samajhte haiñ
ki lafz-e-hijr se raushan-bayāñ visāl kā hai