Tags-Visaal

ye soz-o-sāz-e-nihāñ thā vo soz-o-sāz-e-ayāñ
visāl-o-hijr meñ bas farq thā to itnā thā

visāl us se maiñ chāhūñ kahāñ ye dil merā
ye ro rahā huuñ ki kyuuñ us ko maiñ ne dekhā thā

tirī jabīñ pe shikan kyuuñ visāl-lamhe meñ
mohabbatoñ kā yahāñ to nishān honā thā

ye hijāb-e-jism-e-ḳhākī ki hai diid kā munāfī
kabhī darmiyāñ se uThtā to visāl-e-yār hotā

use ḳhabar thī ki ham visāl aur hijr ik saath chāhte haiñ
to us ne aadhā ujaaḌ rakkhā hai aur aadhā banā diyā hai

ġhamoñ ko haavī na hone diyā kabhī dil par
shab-e-firāq bhī zikr-e-shab-e-visāl rahā

ye hijr-zād samajhtā hai kam visāl kī baat
batā jo ramz-o-kināya haiñ ḳhuub phailā ke

baḌī udaas haiñ shāmeñ tire visāl ke ba.ad
ki zaḳhm phir se ubhar aa.e indimāl ke ba.ad

ab firāq-o-visāl baar hue
umr guzrī hai be-qarār hue

jo ho chukā yaqīñ ki nahīñ tāqat-e-visāl
dam meñ hamāre vo sitam-ījād aa gayā

hijr apnī taraf se hai varna
us taraf se visāl meñ sab haiñ

ārzū-e-visāl meñ sab haiñ
justujū-e-muhāl meñ sab haiñ

ḳhudā kare ki mayassar tirā visāl na ho
bahut aziiz haiñ ye hijr ke ujāle mujhe

kisī ke ghar na maah o saal ke mausam meñ rahte haiñ
ki ham hijr-o-visāl-e-yār ke aalam meñ rahte haiñ

hijr ho yā visāl ho kuchh ho
ham haiñ aur us kī yādgārī hai

hijr-o-visāl ḳhatm hue Thiik hai ye khel
tujh ko bhī nāgavār mujhe bhī azaab thā

kaise vo din the pyaar ke ḳhud pe bhī jab yaqīn thā
pal meñ judā.ī Daal lī pal meñ visāl kar liyā

lo ham ne Dhaal liyā ḳhud ko us ke paikar meñ
lo ham ne hijr ke arse ko bhī visāl kiyā

kaTtī hai shab visāl kī palkeñ jhapakte hī
jis kī sub.h na ho kabhī vo raat bhī to ho

tirā visāl hī zarḳheziyoñ kā lamha thā
phir is ke ba.ad to banjar zamāne likkhe the