Tags-Visaal

hai aadat duur rahne kī agar vo sāmne aa.e
maiñ shām-e-zindagī chāhūñ visāl-e-yār se pahle

visāl to hai kahāñ mayassar magar ḳhayāl-e-visāl hī meñ
maze uḌāte havas nikaltī jo saath andāz-e-ram na hotā

visāl ko ham taras rahe the jo ab huā to mazā na paayā
adū ke marne kī jab ḳhushī thī ki us ko rañj-o-alam na hotā

ajiib shaḳhs huuñ fart-e-vabāl hote hue
firāq maañg rahā huuñ visāl hote hue

shab-e-visāl tire dil ke saath lag kar bhī
mirī luTī huī duniyā tujhe pukārtī hai

shaam shab-e-visāl huī yaañ ki is taraf
hone lagā tulūa hī ḳhurshīd rū-siyāh

ye lailā majnūñ ye hiir rāñjhā ye shīrīñ farhād kī mohabbat
thī aisī shiddat kahīñ jo un ke visāl hote kamāl hote

hijr kī dhuup kyuuñ nahīñ Dhaltī
jashn-e-shām-e-visāl hote hue

visāl-o-hijr se maiñ kis kā intiḳhāb karūñ
yahāñ pe ḳhud se mujhe ḳhauf ishtibāh kā hai

dam-e-visāl ye hasrat rahī rahī na rahī
jamāl-e-yār kī hairat rahī rahī na rahī

jo vasl-e-yār kī tadbīr kī visāl huā
ḳhayāl aish kā aayā to ik malāl huā

kaash ye ā.īna-e-hijr-o-visāl
TuuT jaa.e mujhe andhā kar ke

nahīñ nigāh meñ manzil to justujū hī sahī
nahīñ visāl mayassar to aarzū hī sahī

diyā jo rañj tire ishq ne to rāhat thī
firāq-e-talḳh to shīrīñ mujhe visāl huā

guzarte lamhoñ ke hamrāh TūTtā hai badan
visāl-e-yār kī lazzat kā baar uThāne de

shab-e-visāl jo pahnā tire badan kā libās
tamām umr na bhāyā kisī bhī tan kā libās

roz-e-visāl jis ko kahtī hai ḳhalq vo hī
maz.hab meñ āshiqoñ ke roz-e-vafāt bhī hai

hijr baḳhshā kabhī visāl diyā
ishq ne jo diyā kamāl diyā

shab-e-visāl ye kahte haiñ vo sunā ke mujhe
kisī ne luuT liyā apne ghar bulā ke mujhe

taskīn-e-visāl o rañj-e-furqat kyā hai
kyā hai ye kashākash-e-mohabbat kyā hai