Tags-Wada

ham bhī to dekheñ ham kitne sachche haiñ
ḳhud se bhī ik va.ada kar ke dekhā jaa.e

gire jo kuchh surḳh gul zamīñ par kahā ye bulbul ne ḳhaak uḌā kar
huā hai va.ada mirā barābar ye sūrateñ haiñ mire jigar kī

ḳhud-farebī kā fusūñ tujh pe hai kaarī varna
kam nahīñ hai shab-e-ġham se shab-e-va.ada ai dil

hai ġhanīmat ye fareb-e-shab-e-va.ada ai dil
kyā koī degā tujhe is se ziyāda ai dil

mahshar kā kiyā va.ada yaañ shakl na dikhlā.ī
iqrār ise kahte haiñ inkār ise kahte haiñ

va.ada to ye ki ghar meñ basā.eñge ham tumheñ
phir ham ko qaidī-e-dar-o-dīvār karte ho

shab-e-va.ada vo jo na aa sake to 'qamar' kahūñgā ye charḳh se
tire taare bhī ga.e rā.egāñ tirī chāñdnī bhī dharī rahī

har vaada jaise harf-e-ġhalat thā sarāb thā
ham to nisār-e-jur.at-e-inkār ho ga.e

nahīñ va.ada nahīñ hogā koī ab
bahut hogā to bas zinda rahūñgā

koī va.ada vo kar jo puurā ho
koī sikka vo de ki jaarī ho

'qā.em' likhā thā us ne aane kā shab ko va.ada
so din meñ dekhī sau dam us sīm-tan kī paatī

vaa.iz butoñ ko ḳhuld meñ le jā.eñge kahīñ
hai vaada kāfiroñ se azāb-e-alīm kā

jaan nikle hai aur miyāñ de Daal
aaj va.ada na Taal bose kā

umr tanhā kaaT dī va.ada nibhāne ke liye
ahd bāñdhā thā kisī ne āzmāne ke liye

vaada us māh-rū ke aane kā
ye nasība siyāh-ḳhāne kā

aap kā va.ada kal bhī thā aaj hai va.ada dūsrā
qaul-o-qarār aap kā jab na ġhalat na ab ġhalat

us se va.ada hai mileñge shaam ko
shaam kitnī der ke baad aa.egī

us kī va.ada-ḳhilāfiyāñ dekho
aane kahtā hai be-par nahīñ aatā

va.ada jhūTā nakarda mard nahīñ
qaul se fe.al jab ḳhilāf huā

be-ḳhudī hashr meñ kyā yaad dilā.ūñgā use
ḳhud mujhe yaad ab us shoḳh kā va.ada bhī nahīñ