Tags-Wada

sub.h bichhaḌ kar shaam kā va.ada shaam kā honā sahal nahīñ
un kī tamannā phir kar lenā sub.h ko pahle shaam karo

va.ada karne kī zarūrat kyā thī
phir na aane kā bhalā kyā baa.is

sab se kiyā hai vasl kā vaada alag alag
kal raat vo sabhī pe bahut mehrbān thā

ai mire vāda-shikan ek na aane se tire
dil ko bahkāne ka.ī talḳh tavahhum aa.e

ye dil ko taab kahāñ hai ki ho ma.āl-andesh
unhoñ ne va.ada kiyā is ne e'tibār kiyā

ik qayāmat hai aap kā va.ada
chaliye ye bhī azaab ho jaa.e

subūt hai ye mohabbat kī sāda-lauhī kā
jab us ne va.ada kiyā ham ne e'tibār kiyā

ummīd to bañdh jaatī taskīn to ho jaatī
va.ada na vafā karte va.ada to kiyā hotā

bad-ahdiyoñ meñ vaqt-e-vafāt aan bhī pahuñchā
vaada na huā ek vafā yaar se ab tak

agarche va.ada nahīñ phir bhī jaane kyoñ 'āmir'
ye dil usī kī hī aahaT pe kaan rakhtā hai

koī ishāra dilāsā na koī va.ada magar
jab aa.ī shaam tirā intizār karne lage

gar tū qasam bhī khaa.e jhūTe haiñ mere pyāre
paimān-o-ahd-o-va.ada qaul-o-qarār pān.cho

rāste dhuñdlā ga.e haiñ raushnī vaalo suno
va.ada jalne kā kiyā thā TimTimāne kā nahīñ

un kī ye ḳhūbī-e-aḳhlāq ki va.ada to kiyā
merī ye shomī-e-taqdīr ki iifā na huā

agar ye tai thā ki har baat se mukarnā hai
to saath dene kā va.ada hī kyoñ kiyā āḳhir