Tags-Wada

va.ada kiyā kis tarah vafā aap ne is baar
kyā zehn kī vaadī meñ bahāne nahīñ utre

ham ḳhud us se tark-e-ta.alluq kar baiThe
jhūTā sachchā har ik va.ada TuuT gayā

shāyad ki kisī aur se thā vasl kā va.ada
ma.alūm huā ye tirī be-zāri-e-shab se

vahī badle hue tevar vahī kal kā va.ada
is liye ham ne tirā naam ḳhudā rakkhā hai

go na kar vaada vafā de na mujhe us kā javāb
mujh se milnā bhī sajan hai tujhe manzūr kabhū

kare jo va.ada to is tarah kā ki dil ko sunte hī ho tasallī
jo sochiye phir to kaisā va.ada faqat bahāna fareb aur chhal

ho barā-e-shām-e-hijrāñ lab-e-nāz se farozāñ
koī ek sham-e-paimāñ koī ik charāġh-e-va.ada

TuuTī huī dīvār kā saaya to nahīñ huuñ
maiñ terā hī bhūlā huā va.ada to nahīñ huuñ

yūñhī va.ada karo yaqīñ ho jaa.e
kyuuñ qasam luuñ qasam ke kyā ma.anī

va.ada Taltā hai jab tū raah meñ dekh
buttī de mujh ko giḌgiḌāte ho

pyaar to mujh se be-shak karte ho
roTī kapḌā aur makān dene kā va.ada kiyā hai

va.ada nahīñ payām nahīñ guftugū nahīñ
hairat hai ai ḳhudā mujhe kyuuñ intizār hai

mirī chāhatoñ ko havā de gayā hai
un āñkhoñ kā va.ada-farāmosh honā

jaan dete ho un ke va.adoñ par
jin kā va.ada vafā nahīñ hotā

vo ummīd kyā jis kī ho intihā
vo va.ada nahīñ jo vafā ho gayā

suntā huuñ ik aahaT sī barābar shab-e-vāda
jaane tire qadmoñ kī sadā hai ki nahīñ hai

chalo tum bhī ham se ye va.ada karo ab
qasam khā ke saarī anā bechte haiñ

karo ye va.ada ki mujh se ḳhafā nahīñ honā
maiñ māntī huuñ ki maiñ baat ko baḌhātī huuñ

vafā kī saltanat iqlīm-e-vāda sar-zamīn-e-dil
nazar kī zad meñ hai ḳhvāboñ se tābīroñ ke kishvar tak