Tags-Wada

bahut dil ko kushāda kar liyā kyā
zamāne bhar se va.ada kar liyā kyā

ādatan kartā hai vo va.ada-ḳhilāfī pahle
phir banātā hai bahāne bhī ki yuuñ hai yuuñ hai

kiyā bharosa us ke va.ade kā magar
dil ke ḳhush rakhne ko ik va.ada to hai

sāya-e-gul meñ zarā der jo sustā.e haiñ
sāya-e-dār se ye va.ada-ḳhilāfī to nahīñ

maiñ apne ahd kī takmīl tujh se kyā kartā
ki maiñ ne ḳhud se bhī va.ada koī nibhāyā nahīñ

koī va.ada aaj tak iifā nahīñ tum ne kiyā
baat sachchī thī magar vo bad-gumāñ hone lagā

visāl-e-yār kā va.ada hai fardā-e-qayāmat par
yaqīñ mujh ko nahīñ hai gor tak apnī rasā.ī kā

hijr kī shab koī va.ada na koī yaad 'zafar'
tū ne kyā chiiz bachā kar mire shā.er rakkhī

qarār-e-jāñ hai tumhārā va.ada ki ghar pahuñch kar maiñ bhej dūñgī
maiñ muntazir hoñ tumhāre ḳhat kā shikāyatoñ kā javāb likhnā

do-chār rashk-e-māh bhī hamrāh chāhiyeñ
vaada hai chāndnī meñ kisī mehrbāñ se aaj

tumheñ shab-e-va.ada dard-e-sar thā ye sab haiñ be-e'tibār bāteñ
yaqīñ na aa.egā ham ko hargiz banāo go tum hazār bāteñ

zahar khā leñge shab-e-va.ada na aaoge agar
apnī mushkil ko ham āsān kiye baiThe haiñ

va.ada kar ke bhuul bhī jaanā ye to terī aadat hai
maiñ hī nahīñ kahtā huuñ aisā log bhī aksar kahte haiñ

laakh ho vasl kā va.ada lekin
vaqt par saaf nikal jā.iyegā

phir jo karne lagā hai tū va.ada
kyā mukarne kā phir irāda hai

sidq-e-dil se pukārnā mujh ko
lauT ā.ūñgā merā va.ada hai

un ke va.ade kī jo tasdīq bhī chāhī 'nūrī'
saaf inkār thā tā.īd-e-mukarrar ke evaz

ek va.ada hai kisī kā jo vafā hotā nahīñ
varna in tāroñ bharī rātoñ meñ kyā hotā nahīñ

kahāñ tak yaad rakkheñge vo 'ārif'
koī va.ada kiyā thā kal kisī se

āñkhoñ āñkhoñ meñ le liyā va.ada
kānoñ-kān ek ko ḳhabar na huī