Tags-Wada

ḳhuun hotā hai sahar tak mire armānoñ kā
shām-e-vāda jo vo pāband-e-hinā hotā hai

palaT kar na dekheñge tum ko dobāra
chalo ab ye va.ada hai tum se hamārā

tark-e-ta.alluqāt kā va.ada nahīñ kiyā
va.ada agar kiyā use puurā nahīñ kiyā

so ga.e ham bhī ki be-kār thā rasta taknā
us ko aanā hī nahīñ thā shab-e-va.ada yuuñ bhī

kitnā ḳhilāf va.ada huā hogā vo ki yaañ
nau-mīdī-o-ummīd musāvāt ho ga.ī

shab-e-va.ada apnā yahī mashġhala thā
uThā kar nazar sū-e-dar dekh lenā

kab va.ada nahīñ kartīñ milne kā tirī āñkheñ
kis roz nigāhoñ meñ paiġhām nahīñ hotā

bas ek va.ada kam-baḳht vo bhī
mar mar ke jiinā sikhlā gayā hai

ik muntazir-e-va.ada kī sham.a jalī hogī
sūraj ke nikalne se kyā raat Dhalī hogī

ai 'fanā' merī mayyat pe kahte haiñ vo
aap ne apnā va.ada vafā kar diyā

aap ne jhūTā va.ada kar ke
aaj hamārī umr baḌhā dī

shāyad is kal se murād huā kartī hai qayāmat kī duurī
'zauqī' se vo apne jab bhī kabhī kal kā va.ada farmāte haiñ

dost ke īfā-e-va.ada kā hai ab tak intizār
guzrā october november bhī september kī tarah

mujhe hai e'tibār-e-va.ada lekin
tumheñ ḳhud e'tibār aa.e na aa.e

be-uzr vo kar lete haiñ va.ada ye samajh kar
ye ahl-e-muravvat haiñ taqāzā na kareñge

balā se jaan ga.ī intizār meñ merī
mujhe to aap kā ik va.ada āzmānā thā

jab chāho chale aao ye va.ada nahīñ achchhā
dil aañkh churātā hai bahut muntazarī se

ab to kar Dāliye vafā us ko
vo jo va.ada udhār rahtā hai

maiñ koī va.ada-farāmosh nahīñ huuñ phir bhī
mujh pe ilzām hai maiñ apnā kahā bhuul gayā

dīdār kā to va.ada mahshar meñ dekh kar kar
bīmār ġham meñ tere tab tak to kyā rahegā