Tags-Wada

merī taqdīr meñ jalnā hai to jal jā.ūñgā
terā va.ada to nahīñ huuñ jo badal jā.ūñgā

qayāmat se nahīñ kam intizār-e-vasl kī lazzat
ḳhudā jaane kahīñ va.ada vafā hotā to kyā hotā

milne kā va.ada un ke to muñh se nikal gayā
pūchhī jagah jo maiñ ne kahā hañs ke ḳhvāb meñ

kar liyā va.ada lo phir us ne jo milne kā phir
dekhnā kal nayā kyā yaad bahāna aayā

zulf ziddī jo jabīñ ko mirī chhūkar guzrī
abr ko yaad koī va.ada nibhānā aayā

dil pūchhtā hai aaj bhī vo rashk-e-nau-bahār
aayā na us ke va.ada-o-paimāñ ko kyā huā

shaam kā va.ada kiyā aa.e vo aadhī raat ko
jazba-e-dil kī mire tāsīr aadhī rah ga.ī

ham ko bhī phir umiid kuchh aisī nahīñ rahī
achchhā huā jo tū ne bhī va.ada nahīñ kiyā

hamārī rāst-goī kaam aa.ī
vafā honā thā va.ada ho rahā hai

kisī se aaj kā va.ada kisī se kal kā va.ada hai
zamāne ko lagā rakkhā hai is ummīd-vārī meñ

ye nayā zulm hai yārab ki unhīñ kā va.ada
ham unheñ yaad dilā.eñ vo kaheñ yaad nahīñ

agar tumheñ kabhī jaanā ho tum chale jaanā
mujhe to va.ada nibhānā kahīñ nahīñ jaanā

har roz hī imroz ko fardā na karoge
va.ada ye karo phir kabhī va.adā na karoge

koī bāteñ thiiñ koī thā sabab jo maiñ va.ada kar ke mukar ga.ī
tire pyaar par to yaqīn thā maiñ ḳhud apne aap se Dar ga.ī

na koī va.ada thā un se na koī pābandī
tamām umr magar un kā intizār kiyā

jab tum aate nahīñ ho va.ade par
malak-ul-maut ko bulāte haiñ

ham to vo haiñ tire va.ade pe bhī jī sakte haiñ
ġhuncha paiġhām-e-sabā se bhī chaTak jaatā hai

is va.ada-ḳhilāfī ne agar jaan hī le lī
phir jhūTī tasallī tirī taḌpā.egī kis ko

jo haiñ dast-e-gustāḳh apne salāmat
to jhūTā hī va.ada vafā hai kisī kā

hasīñ hashr meñ sar jhukā.e hue haiñ
vafā aaj va.ada huā hai kisī kā