Tags-Wada

kis muñh se kah rahe ho hameñ kuchh ġharaz nahīñ
kis muñh se tum ne va.ada kiyā thā nibāh kā

jin āñkhoñ se rañgoñ vaalī bārish kā ik va.ada thā
vo āñkheñ to miTTī ho ga.iiñ sub.h-o-shām ke chakkar meñ

tum se kyā vāda-ḳhilāfī kī shikāyat karte
tum ne to lauT ke aane kī bhī zahmat nahīñ kī

intizār-e-shab-e-va.ada kī na pūchho rūdād
raat āñkhoñ meñ kaTī hai kisī bekal kī tarah

tū ne ik shaam jo aane kā kiyā thā va.ada
maiñ ne din-rāt charāġhoñ ko jalā.e rakkhā

ab to kar Dāliye vafā us ko
vo jo va.ada udhār rahtā hai

merī ḳhizāñ to sabz huī is ḳhumār meñ
aane kā us ne va.ada kiyā hai bahār meñ

us ke vādoñ se itnā to sābit huā us ko thoḌā sā pās-e-ta.alluq to hai
ye alag baat hai vo hai vāda-shikan ye bhī kuchh kam nahīñ us ne vaade kiye

kis tarah ham se bose kā va.ada kare vo shoḳh
najrī raqīb se hai Darā muñh kī bhaap kā

un se va.ada to kar liyā lekin
apnī kam-fursatī ko bhuul gayā

kiyā hai va.ada to phir bazm-e-raqs meñ aanā
na kījiyo mujhe tum sharmsār holī meñ

suno zikr hai ka.ī saal kā ki kiyā ik aap ne va.ada thā
so nibāhane kā to zikr kyā tumheñ yaad ho ki na yaad ho

vo jo ham meñ tum meñ qarār thā tumheñ yaad ho ki na yaad ho
vahī ya.anī va.ada nibāh kā tumheñ yaad ho ki na yaad ho

tumhārā va.ada hai kaisā va.ada ki jis kā dil ko yaqīñ nahīñ hai
nagīn-e-be-naqsh to hazāroñ ye naqsh hai aur nagīñ nahīñ hai

us kā va.ada tā-qayāmat kam se kam
aur yahāñ marne kī fursat kam se kam

kūcha hai tirā va.ada-gah-e-ḳhalq ki jis meñ
do-chār jo baiThe haiñ to do-chār khaḌe haiñ

aane kā va.ada kar ke vo hañste hue chale
ma.alūm abhī se lutf-e-qadīmāna ho gayā

aap to muñh pher kar kahte haiñ aane ke liye
vasl kā va.ada zarā āñkheñ milā kar kījiye

va.ada gar roz kiye jā.iyegā
roz samjhūñgā ki aaj ā.iyegā

na tum aa.e na chain aayā na maut aa.ī shab-e-va.ada
dil-e-muztar thā maiñ thā aur thiiñ be-tābiyāñ merī