Tags-Wafa

ajiib josh-e-junūñ hai us kā ajiib tarz-e-vafā hai merā
maiñ lamha lamha simaT rahī huuñ vo reza reza bikhar rahā hai

qissa-e-dil meñ vafā kī baat par
us ne yuuñ dekhā ki ham chup ho ga.e

TuuTā to aziiz aur huā ahl-e-vafā ko
dil bhī kahīñ us shoḳh kā paimāñ to nahīñ hai

'shārib' ye jāntā huuñ ki duniyā hai bevafā
chalnā paḌegā phir bhī isī kārvāñ ke saath

us vaqt rañg lā.egā afsāna-e-vafā
dil kā lahū jab aa.egā ashk-e-ravāñ ke saath

rāh-e-vafā dushvār bahut hai
soch samajh kar paañv baḌhānā

munfarid un kī mohabbat munfarid un kī vafā
dūriyāñ rakhte haiñ phir bhī ham-navā kahne ko haiñ

kaam hai un kā jafā vo bā-vafā kahne ko haiñ
dete haiñ jo dard-e-dil ahal-e-shifā kahne ko haiñ

'qatīl' kām-o-dahan apnā saath deñ ki na deñ
vafā kā zā.iqa lekin shabāb jaisā hai

is jahāñ meñ nahīñ koī ahl-e-vafā
ai 'fanā' is jahāñ se kinārā karo

apnā paḌāv dasht-e-vafā be-āb-o-giyāh
tum ko to do chaar qadam hī jaanā hai

jis jagah chehra hī meyār-e-vafā Thahrā hai
ḳhaak hī ḳhaak vahāñ dast-e-hunar meñ aa.ī

zamīñ pe dil kī mohabbat javān hotī rahī
vafā kī dhuup pe bādal jafā ke chhāne tak

tū ye samajh rahā hai ki majbūr-e-ishq huuñ
kuchh soch kar fareb-e-vafā khā rahā huuñ maiñ

ye mahrūmī nahīñ pās-e-vafā hai
koī tere sivā dekhā na jaa.e

ġhalat hai jo sunā par aazmā kar
tujhe ai bevafā dekhā na jaa.e

mar miTe naam par vafā ke ham
terī be-e'tibāriyāñ na ga.iiñ

is daur meñ mafhūm-e-mohabbat hai tijārat
is daur meñ hotī hai vafā aur tarah kī

sog meñ apne zaar ke yār-e-vafā-shi.ār ke
mehñdī chhūī na haath se missī na muddatoñ malī

mū-e-safed aa gayā dhabbā ḳhizāb kā lagā
fasl-e-shabā-e-be-vafā dāġh-e-firāq de chalī