Tags-Wafa

mū-e-safed aa gayā dhabbā ḳhizāb kā lagā
fasl-e-shabā-e-be-vafā dāġh-e-firāq de chalī

bevafā logoñ meñ rahnā tirī qismat hī sahī
in meñ shāmil maiñ tirā naam na hone dūñgā

unheñ apnī jafāoñ par pashemānī huī āḳhir
sharīk-e-mātam-e-ahl-e-vafā hone kā vaqt aayā

kab se mutahammil hai jafāoñ kā dil-e-zār
zinhār-vafā ho na sakī yaar se ab tak

'habīb' ham ham-safīr-e-bulbul hamesha the gulshan-e-jahāñ meñ
vafā kī ḳhū bū ho jis meñ vo gul nazar na aayā hazār dekhā

ye tū nahīñ ki vāda-e-vafā ko rauñdtā phire
ye maiñ huuñ sarfarosh-e-dil jo kah diyā vo ho chukā

vafā jo zindagī meñ thī vahī hai bād-e-marg bhī
ye imtihān rah gayā vo imtihān ho chukā

sar-faroshān-e-vafā ko bhī na chhoḌā ishq ne
marhale saarī ḳhatā ke mehrbāñ tak aa ga.e

maiñ dard-e-furqat se jāñ-ba-lab huuñ tumheñ yaqīn-e-vafā nahīñ hai
mujhe nahīñ e'tibār apnā tumheñ nahīñ e'tibār merā

ḳhulūs pyaar vafā dostī sila kyā hai
haTāo aisī hikāyāt meñ dharā kyā hai

na chhoḌā sard jhoñkoñ ne vafā ko
jo shāḳh-e-dard kī tanhā kalī thī

vaqt ke saath badal Daale haiñ ādāb-e-vafā
aap ke ishq kī tahzīb na.ī lagtī hai

vafā kī rāhoñ pe chal paḌe ho to dekho dil ko sambhāle rakhnā
qadam qadam dard-e-nā-rasā.ī yahāñ thakan kā hisāb kaisā

sukūn-e-dil kā maqām pūchho vafā kī manzil ke rāhiyoñ se
kaThin hai har din masāfatoñ kā ye ratjagoñ kā azaab kaisā

'ḳhāvar' kisī bhī rishte ko hāsil nahīñ sabāt
juz rishta-e-vafā jo dam-e-vāpsīñ se hai

imtihān-e-vafā pe karb-e-firāq
paas haiñ haa.e aur paas nahīñ

maiñ bevafā huuñ to vo kyuuñ nazar churā ke ga.e
zarā milā ke nazar se nazar ga.e hote

imtihān-e-vafā hameñ manzūr
intihā-e-sitam kiye jaao

dushman harīf-e-rāh-e-vafā hai ḳhudā kī shaañ
vahāñ jis pe thā yaqīn mujhe us kā gumāñ na thā

kaisī hayā kahāñ kī vafā pās-e-ḳhalq kyā
haañ ye sahī ki aap ko aanā yahāñ na thā