Tags-Wafa

ham jinheñ ham-safar-e-rāh-e-vafā jānte the
kyā batā.eñ ki vahī log hamāre na rahe

ye aur baat ki iqrār kar sakeñ na kabhī
mirī vafā kā magar un ko e'tibār to hai

ham se vafā-shi.ār ko bhī tere rū-ba-rū
khānī paḌī vafā kī qasam tere shahr meñ

vafā kī kaun sī manzil pe us ne chhoḌā thā
ki vo to yaad hameñ bhuul kar bhī aatā hai

ahl-e-dil aur bhī haiñ ahl-e-vafā aur bhī haiñ
ek ham hī nahīñ duniyā se ḳhafā aur bhī haiñ

nāla-sanjī-e-anādil se ye chaltā hai pata
naam ko bū-e-vafā arbāb-e-gulshan meñ nahīñ

us bevafā se kar ke vafā mar-miTā 'razā'
ik qissa-e-tavīl kā ye iḳhtisār hai

zindagī rāh-e-vafā meñ jo miTā dete haiñ
naqsh ulfat kā vo duniyā meñ jamā dete haiñ

bahut sambhālā vafā kā paimāñ magar vo barsī hai ab ke barkhā
har ek iqrār miT gayā hai tamām paiġhām bujh ga.e haiñ

mansūr se kahtī hai yahī dār-e-mohabbat
us kī ye sazā hai jo gunahgār-e-vafā ho

khā us kī qasam jo na tujhe dekh chukā ho
tere to farishtoñ se bhī va.ada na vafā ho

jis meñ marqūm thā vafā kā sabaq
phir vo le kar kitāb aa.e the

is barastī raat kā ye āḳhirī aañsū bhī kal
mujh se chāhat us kī āñkhoñ se vafā le jā.egā

jal-bujhegā ik na ik din sab kā sab shahr-e-vafā
rah ga.ī ik raakh so paanī bahā le jā.egā

saḳht zamīñ-parast the ahd-e-vafā ke pāsdār
uḌ ke bulandiyoñ meñ ham gard-e-malāl ho ga.e

ishq hai apnā pā.edār terī vafā hai ustuvār
ham to halāk-e-varzish-e-farz-e-muhāl ho ga.e

phir mohabbat kī zamāne meñ na pursish hogī
ro.egī siskiyāñ le le ke vafā mere baad

ik nigāh-e-āshnā ko bhī vafā kartā nahīñ
vā huiiñ mizhgāñ ki sabza sabza-e-begāna thā

zulm hai tujh se ba-taqrīb-e-takalluf mansūb
varna taqdīr-e-vafā ye hai ki barbād rahe

vo jafā kareñ to jafā kareñ maiñ vafā se baaz na ā.ūñgā
unheñ apne kaam se kaam hai mujhe apne kaam se kaam hai