Tags-Wafa

sargarm-e-tamāsha thā dil mahv-e-adā barsoñ
samjhā hī nahīñ nādāñ mafhūm-e-vafā barsoñ

hameñ vafā pe vafā aaj tak na raas aa.ī
unheñ sitam pe sitam sāzgār hotā hai

maiñ kushta-e-vafā sahī 'nāsir' magar zarūr
ik bevafā ko dād-e-vafā dene ā.ūñgā

vafā kā yuuñ to dam bharte haiñ is duniyā meñ sab lekin
vafā ke naam par miT kar dikhānā kis ko aatā hai

kabhī kī thī jo ab vafā kījiyegā
mujhe pūchh kar aap kyā kījiyegā

ārzūoñ se jo paimān-e-vafā ham rakhte
sānehe zaḳhm bhī hote to gulistāñ hote

vafā kī raah meñ maiñ aaj bhī akelā huuñ
koī nahīñ hai mire saath us se kah denā

ye ḳhilāf ho gayā āsmāñ ye havā zamāne kī phir ga.ī
kahīñ gul khile bhī to buuñd se kahīñ husn hai to vafā nahīñ

ārzūeñ hasrateñ va.ada o paimān-e-vafā
surḳhiyāñ kitnī milī haiñ ik fasāne ke liye

ho ke māyūs-e-vafā tark-e-vafā to kar luuñ
lekin is tark-e-vafā kā bhī bharosā kyā hai

kaash maiñ tujh sā bevafā hotā
phir mujhe tujh se kyā gila hotā

ham sar-e-rāh-e-vafā us ko sadā kyā dete
jaane vaale ne palaT kar hameñ dekhā bhī na thā

ġhalat nahīñ ki ho tum jāda-āzmā-e-haram
na hogī rāh-e-vafā shaiḳh tum se tai ab bhī

tujhe dil meñ basā.eñge tire hī ḳhvāb dekheñge
miTeñge terī chāhat meñ vafā ke baab dekheñge

jab vafā karte haiñ ham sirf vafā karte haiñ
aur jafā karte haiñ jab sirf jafā karte haiñ

dekho ab bhī jins-e-vafā nāyāb nahīñ
apnī jaan pe khelne vaale ab bhī haiñ

mirī na pūchh ki terī galī meñ ḳhaak huuñ maiñ
tujhī ko merī vafā kā na e.atibār aayā

badal ga.ī haiñ jahāñ par vafā kī sab rasmeñ
ujaḌ ga.e haiñ diloñ ke dayār kahte haiñ

ham us ko apne haq meñ āfat-e-jāñ aur balā samjhe
butān-e-be-vafā haiñ jin ko ik apnī adā samjhe