Tags-Wafa

na muravvat hai na ulfat na vafā mere ba.ad
merā sarmāya bhī duniyā se uThā mere ba.ad

zab.h ke vaqt bhī qātil ko duā.eñ dī haiñ
qatre qatre se Tapaktī hai vafā mere ba.ad

bazm-e-mātam hī meñ aa jaao zarā mere ba.ad
chāhiye kuchh to tumheñ pās-e-vafā mere ba.ad

māshūqoñ se ummīd-e-vafā rakhte ho 'nāsiḳh'
nādāñ koī duniyā meñ nahīñ tum se ziyāda

yaad rakh har dam ḳhudā ko paas rakh husn-e-vafā
saḳht rakh diiñ ko mudām aur jam.a kar ilm ai javāñ

vafā kī raah pe marnā bhī thā mujhe manzūr
koī to hogā sabab mere ab mukarne kā

chamak rahā vahī gauhar-e-vafā ban kar
'guhar' jo ashk mirī chashm-e-intizār meñ thā

vo nā-shanās-vafā sej par thā phūloñ kī
maiñ āshnā-e-vafā dasht-e-ḳhār-ḳhār meñ thā

ye aur baat ki ham tum ko bevafā na kaheñ
magar ye jānte haiñ jaur-e-āsmāñ kyā hai

ā.īna TuuTe hue dil kā dikhā duuñ maiñ agar
bevafā ḳhud tirā chehra bhī utar jā.egā

be-kār jab duā hai davā kyā karegī aaj
aise meñ zindagī bhī vafā kyā karegī aaj

maiñ apnā samajhtī rahī arbāb-e-vafā ko
vo ġhair se milte rahe chālāk bahut the

yūñhī umr-bhar tire rañg-o-bū se mire lahū kī vafā rahe
maiñ charāġh ban ke jalā karūñ to gulāb ban ke khilā rahe

ye jhijhak rah-e-vafā meñ, ye shikāyat-e-taġhāful
hameñ dhaḌkanoñ meñ paate agar e'tibār karte

guzre hai dekheñ kyūñkar hamārī
us bevafā se ne rasm ne raah

bevafā kahne kī shikāyat hai
to bhī vāda-vafā nahīñ hotā

rahzanoñ ke haath saarā intizām aayā to kyā
phir vafā ke mujrmoñ meñ merā naam aayā to kyā

udaas āñkhoñ meñ palkoñ kī namī meñ
jhalaktī thī vafā bhī be-ruḳhī meñ

maiñ apnī āñkhoñ se apnā zavāl dekhtā huuñ
maiñ bevafā huuñ magar be-ḳhabar na jaan mujhe

tauhīn-e-vafā hai ye, hañgāma hai kyuuñ itnā
is dasht-e-vafā meñ kyā pahlī ye shahādat hai