Tags-Wafa

har ek saañs juḌī hai tirī razā ke saath
to kyā yahī hai mukammal vafā mire darvesh

mahfil meñ agar zikr ho arbāb-e-vafā kā
aisā nahīñ 'rāhat' ki tirā naam na hogā

huā un ko kab e'timād-e-vafā
jatāte rahe ham mohabbat abas

ḳhushiyāñ thiiñ bevafā na rahīñ zindagī ke saath
ġham bā-vafā the chalte rahe aadmī ke saath

miTte miTte miT ga.ī jān-e-vafā kī aarzū
aate aate be-qarārī ko qarār aa hī gayā

ye unhīñ kā nuur hai jis meñ ham chale hausle se qadam qadam
jo sarishk ġham ke bahā liye jo diye vafā ke sañjo liye

is daur meñ ki jis meñ hai jins-e-vafā kā qaht
ham se vafā-shi.ār jo baaqī haiñ kam nahīñ

baat bhī jis se ab nahīñ mumkin
aao us be-vafā kī baat kareñ

bevafā.ī kā zamāna hai magar aap 'hafīz'
naġhma-e-mehr-o-vafā sab ko sunāte rahiye

pattī pattī se huā rañg-e-vafā kā iz.hār
naujavānān-e-chaman ban ga.e tasvīr-e-bahār

qaum ke dard se huuñ soz-e-vafā kī tasvīr
merī rag rag se hai paidā tap-e-ġham kī tāsīr

kis ko ma.alūm thī is gulshan-e-aḳhlāq kī raah
maiñ ne phūloñ ko kiyā rañg-e-vafā se āgāh

jitne bhī dil-rīsh haiñ us ke sab ko naame bhej bulā
us be-mehr vafā dushman kī yādoñ kā darbār kareñ

jo chal sako to chalo ki rāh-e-vafā bahut muḳhtasar huī hai
maqām hai ab koī na manzil farāz-e-dār-o-rasan se pahle

do qadam bhī na chale rāh-e-vafā meñ ham log
hai abhī zauq-e-talab ḳhaam tumheñ kyā ma.alūm

jo kafan bāñdh ke chalte haiñ vafā kī rah meñ
zindagī kar chuke nīlām tumheñ kyā ma.alūm

hasb-e-mazāq o hasb-e-shauq ek ik adā ḳharīd lī
us ne jafā.eñ mol liiñ maiñ ne vafā ḳharīd lī

nām-e-vafā pe de ke jaan dil ne vafā ḳharīd lī
thī bhī ḳharīdne kī chiiz ḳhuub kiyā ḳharīd lī

ik din to vafā bhī karte va.ada
guzrī hai umīd-vār har raat

Dareñge log vafā ke ḳhayāl se 'nazmī'
mirī vafāoñ kā jis din sila milegā mujhe