Tags-Wafa

maanā vo ek ḳhvāb thā dhokā nazar kā thā
us bevafā se rabt magar umr-bhar kā thā

jis se TuuTe mirā pindār-e-vafā
mujh ko aisī bhī sazā de koī

vafā kā lāzmī thā ye natīja
sazā apne kiye kī pā rahā huuñ

butoñ ko qaul detā huuñ vafā kā
qasam apne ḳhudā kī khā rahā huuñ

mirī bazm-e-vafā se jaane vaalo
Thahar jaao ki maiñ bhī aa rahā huuñ

phir us ke baad kabhī lauT kar nahīñ aayā
vafā ke rañg nazar meñ utārne vaalā

qadam to rakh manzil-e-vafā meñ bisāt khoī huī milegī
vahīñ kahīñ naqsh-e-pā kī sūrat paḌī huī zindagī milegī

ujaḌ gayā thā kisī zalzale meñ shahr-e-vafā
na jaane phir use ham ne bhī kyuuñ basāyā nahīñ

aap ke ahd-e-vafā par mirā īmāñ jaise
kisī girtī huī dīvār pe takiya karnā

giraftār-e-vafā rone kā koī ek mausam rakh
jo naala roz bah nikle vo barsātī nahīñ hotā

jafāoñ kā us se gilā kījiye jab
tū kahtā hai vo bevafā be-muravvat

tirī chashm-poshī se āñkhoñ meñ dam hai
idhar dekh o bevafā be-muravvat

unheñ āmāda-e-mehr-o-vafā karne kā vaqt aayā
baḌī muddat meñ arz-e-mudda.ā karne kā vaqt aayā

bahār aa.ī kisī kā sāmnā karne kā vaqt aayā
sambhal ai dil ki iz.hār-e-vafā karne kā vaqt aayā

musalsal ret par chalnā vafā kī riit Thahrī hai
tirī dahlīz tak phailā vo sahrā yaad aatā hai

tumhī ne rāh-e-vafā par qadam rakhā na kabhī
charāġh ban ke maiñ har moḌ par jalā barsoñ

jo aziiz jaañ se hai kāfira use zeb de na munāfira
ye nahīñ ba.iid ki us ko pās-e-vafā na ho kahīñ yuuñ na ho

kisī bhī samt koī dil-kushā manzar nahīñ miltā
vafā ke shahr meñ ehsās kā paikar nahīñ miltā

tumhāre hāthoñ kā lams jab bhī mirī vafā kī hatheliyoñ par hinā banegā
to soch lūñgī

zindagī bhuul ga.ī apne ġhamoñ meñ is ko
daulat dard vafā bhī na lagī haat mire