Tags-Wafa

bevafā us ko hī kyuuñ kahiye 'ḳhalīl'
hai hamārā dil bhī harjā.ī bahut

vo husn jis se milā hai mujhe shu.ūr-e-vafā
ḳhudā nahīñ thā to kyuuñ vahi-e-ishq nāzil kī

ye kis jannat meñ le aayā hai paimān-e-vafā dil ko
ki har sūrat yahāñ ārām-e-jāñ ma.alūm hotī hai

aaj bhī shahr meñ hai merī vafā kī shohrat
aa.eñ aur aa ke zarā mere sitamgar dekheñ

tumheñ achchhī tarah pahchāntī huuñ
vafā kā mujh se tum va.ada na karnā

ab tak yahāñ hai ijz o niyāz o vafā kī dhuum
vaañ lutf o iltifāt o madārā nahīñ rahā

Dil-e-pur-ġham abhī ban jaa.e davā-e-taskīn
vo nazar Daal jo mānūs-e-vafā hotī hai

jinhoñ ne josh-e-vafā meñ bigāḌ lī hastī
zamāna aaj bhī letā hai imtihāñ un kā

haTe na rāh-e-vafā se vafā ke dīvāne
hazār baar liyā tum ne imtihāñ un kā

kiye haiñ rāh-e-vafā meñ vahīñ vahīñ sajde
milā hai naqsh-e-kaf-e-pā jahāñ jahāñ un kā

jo unheñ vafā kī sūjhī to na ziist ne vafā kī
abhī aa ke vo na baiThe ki ham uTh ga.e jahāñ se

mile ġhairoñ se mujh ko ranj o ġham yuuñ bhī hai aur yuuñ bhī
vafā-dushman jafā-jū kā sitam yuuñ bhī hai aur yuuñ bhī

majbūriyoñ kā paas bhī kuchh thā vafā ke saath
vo rāste se phir gayā kuchh duur aa ke saath

be-vafā bhī ho sitamgar bhī jafā-pesha bhī
ham ḳhudā tum ko banā leñge tum aao to sahī

mire gunāh meñ shāmil rahā hai tū bhī 'asad'
nibhāne ahd-e-vafā ab mire azaab meñ aa

ye qadam qadam pe jameñge paañv ki baḌh sakoge na aage tum
ho tumhāre kūche kī ḳhaak meñ kahīñ dafn ahl-e-vafā hue

tū is tarah se mire saath bevafā.ī kar
ki tere ba.ad mujhe koī bevafā na lage

kī vafā kis se bhalā fāhisha-e-duniyā ne
hai tujhe shauq jo is qahba kī dāmādī kā

supurd-e-ġham-zadagān-e-saf-e-vafā huā maiñ
paḌā huuñ umr kī dīvār se girā huā maiñ

jalte haiñ jahāñ vaale lo jaleñ ham rāh-e-vafā meñ saath chaleñ
duniyā ko chhoḌo duniyā to dil vāloñ kī dushman hotī hai