Tags-Wafa

safar kaThin hai maiñ rāhoñ se āshnā bhī nahīñ
tirī vafā ke sivā koī aasrā bhī nahīñ

'ehsān' aisā talḳh javāb-e-vafā milā
ham is ke ba.ad phir koī armāñ na kar sake

tujh se ummīd-e-vafā ḳhvāb-e-pareshāñ to na thī
bevafā umr-e-gurezāñ thī ki tūlānī na thī

maiñ hī pāgal thā vafā DhūñD rahā thā in meñ
terī āñkhoñ meñ to kājal ke sivā kuchh bhī nahīñ

vo mere lāshe par bole nazar yuuñ pher kar mujh se
chale hūroñ se tum milne nihāyat bevafā nikle

dard kī shiddat aur baḌhī thī shahr-e-vafā kī shāmoñ meñ
aur vīrānī baiTh ga.ī thī in akhiyoñ ke paanī meñ

jafā se thak ga.e to bhī na pūchhā
ki tū ne kis tavaqqo par vafā kī

jab bahāreñ bevafā nikleñ to kis ummīd par
intizār-e-gul kī hasrat bāġhbāñ le kar chale

na suud hai na ziyāñ hāsil-e-vafā kyā hai
vafā-parast na maiñ huuñ na vo burā kyā hai

mirā haal ḳharāb sunā to kahā ki vo sāmne mere na aa.e kabhī
mujhe rote jo dekhā to hañs ke kahā ki ye sheva-e-ahl-e-vafā hī nahīñ

is bevafā se bolnā tauhīn thī mirī
lekin ye mere zaḳhm-e-jigar bolne lage

na.ī umañgoñ ko saath le kar ravāñ huuñ phir jāda-e-vafā par
magar hai ehsās-e-nā-murādī ki sahmā sahmā sā har-qadam hai

rukāvaT hai ḳhalish hai chheḌ hai iizā pe iizā hai
sitam ahl-e-vafā par dam-ba-dam aisā bhī hotā hai

na āñkhoñ meñ muravvat hai na jā-e-rahm hai dil meñ
jahāñ meñ bevafā māshūq tum sā kam nikaltā hai

thī jin se kuchh umīd-e-vafā vo badal ga.e
hargiz na ab kisī kī tamannā kareñge ham

shahr-e-vafā meñ jā nikle the ham bhī nuur se milne ko
vo dīvāna ik parchhā.īñ ke hamrāh Tahaltā thā

jo huā ye darj thā pahle hī apne baḳht meñ
is kā matlab to huā ki bevafā koī nahīñ

na kareñ aap vafā ham ko kyā
bevafā aap hī kahlā.iyegā

milne ke liye jaanā use shauq se lekin
is ruḳh pe uḌā rañg-e-vafā dekhte rahnā

hue haiñ jā ke āshiq ab to ham us shoḳh chanchal ke
sitamgar be-muravvat be-vafā be-rahm achpal ke