Tags-Wafa

vafā udaas huī thī fareb khā khā kar
mirī nigāh se guzrī to mushk-bār guzrī hai

tai karnā ye muhāl hai apne shu.ūr se
jo bevafā hai un se kahāñ tak vafā karo

vo to mahfil meñ hī elān-e-vafā kar detā
baat mat pūchhiye phir kaise sambhālī maiñ ne

haañ is meñ kāmdev kī koī ḳhatā nahīñ
raste vafā ke saḳht the dilbar badal ga.e

kyā khā.eñ ham vafā meñ ab īmān kī qasam
jab tār-e-sub.ha rishta-e-zunnār ho chukā

surūd-e-ġham par bhī zindagī meñ tarab ke dhāre bahā rahā huuñ
maiñ un ke sāz-e-jafā par apnī vafā ke naġhme sunā rahā huuñ

vafā kī aañch suḳhan kā tapāk do in ko
diloñ ke chaak rafū se silā nahīñ karte

kaun kahtā hai jafā karte ho tum
shart-e-māshūqī vafā karte ho tum

har ḳhaar hai ġhaltīda-ba-ḳhūñ dasht-e-vafā meñ
ai sañg-e-rah-e-yār kise Thes lagī hai

mujh se thā barsar-e-kīñ rabt-e-nihāñ tum se thā
dil ne gar tum se vafā kī to tumhāre liye kī

pheñk de ḳhushk phuul yādoñ ke
zid na kar tū bhī be-vafā ho jā

sham-e-mehrāb-e-vafā ban ke hayāt-e-rusvā
dil-nigārī kā mirī kuchh to silā detī hai

ai ahl-e-vafā ḳhaak bane kaam tumhārā
āġhāz batā detā hai anjām tumhārā

jurm-e-zikr-e-vafā par vo kahne lagā
jā ke anjām-e-ahl-e-vafā dekhiye

shikāyat us se nahīñ apne-āp se hai mujhe
vo bevafā thā to maiñ aas kyuuñ lagā baiThā

har gaam par hai laġhzish-e-pā kā bhī ik ḳhatar
chaliye rah-e-vafā meñ salāmat-ravī ke saath

kar deñ na be-talab ye musalsal aziyyateñ
dil bhī kahīñ vafā kā salīqa na bhuul jaa.e

vafā kam hai nazar aatī bahut hai
baḌe shahroñ meñ dānā.ī bahut hai

bahut hī zo.am thā apnī mohabbatoñ pe use
nibhā sakā na vafā kāmyāb aisā thā

duniyā meñ ab bhī log vafā ke haiñ mudda.ī
hāsil hamāre haal se ibrat na kar sake