Tags-Wafa

ye savāl kyuuñ ye ḳhayāl kyā hai vafā to is kā ma.aal kyā
yahī zikr vird-e-zabāñ rahā yahī fikr dil ko lagī rahī

ye kaun kahtā hai tū halqa-e-naqāb meñ aa?
shu.ūr-e-rañg-e-vafā ban ke āftāb meñ aa

ab bhī dilā rahā huuñ yaqīn-e-vafā magar
merā na e'tibār karo maiñ nashe meñ huuñ

ek gul us baaġh kā bū-e-vafā rakhtā nahīñ
sabza-e-begāna shauq-e-āshnā le jā.egā

fareb-ḳhurda-e-tahrīk-e-ādamiyat huuñ
vafā kī aas nahīñ 'ramz' aadmī se mujhe

us vafā-dushman se paimān-e-vafā hai ustuvār
zer-e-sañg-e-saḳht hai phir dast-e-yārāñ in dinoñ

taqāzā-e-vafā meñ bhī sitam kā ek pahlū hai
maiñ ronā chāhtā huuñ aur vo rone nahīñ dete

haiñ dhabbe teġh-e-qātil ke jise dhone nahīñ dete
mire ahbāb tajdīd-e-vafā hone nahīñ dete

vo ahd-e-rafta vo ulfat vo ehtirām-e-vafā
gayā to saath meñ saarī sifāt le ke gayā

muddatoñ se haiñ milī Thokareñ mujh ko jo yahāñ
ishq-bāzī meñ vafā duuñ to vafā duuñ kis ko

yaad ke tyauhār meñ vasl-o-vafā sab chāhiye
raat ke resham meñ lipTī aap kī chhab chāhiye

havas o vafā kī siyāsatoñ meñ bhī kāmyāb nahīñ rahā
koī chehra aisā bhī chāhiye jo pas-e-naqāb nahīñ rahā

aap kī amānat haiñ aap hī miTā diije
ye nuqūsh ulfat ke ye vafā kī tahrīreñ

the dastaras meñ yuuñ to sab asrār-e-kā.enāt
is umr-e-bevafā ne magar nā-rasā kiyā

yuuñ sañg-dil hayāt se ahd-o-vafā kiyā
dīvār darmiyāñ thī magar ḳhud ko vā kiyā

tire firāq ke sadme qubūl haiñ lekin
jafā ke ba.ad chale to vafā kā daur chale

taskīn mere dil kī aur us bevafā kā qaul
dil meñ fareb bhī hai laboñ par qasam bhī hai

hoñT siinā bhī hai ab farz chalo ye bhī sahī
aisī sharteñ na thiiñ ādāb-e-vafā meñ pahle

maidān-e-vafā darbār nahīñ yaañ nām-o-nasab kī pūchh kahāñ
āshiq to kisī kā naam nahīñ kuchh ishq kisī kī zaat nahīñ

har ḳhūb-rū ho shoḳh-adā aur vafā-shi.ār
kis kaam kā hai phuul agar rañg-o-bū na ho