Tags-Wafa

ai ahl-e-vafā dād-e-jafā kyuuñ nahīñ dete
so.e hue zaḳhmoñ ko jagā kyuuñ nahīñ dete

ye kaisī zindagī hai ai asīr-e-dām-e-ḳhush-fahmī
jafā-e-bāġhbāñ bhī ab vafā ma.alūm hotī hai

ab tum āġhosh-e-tasavvur meñ bhī aayā na karo
chhūT jaane do jo dāmān-e-vafā chhūT gayā

magar tum siiñ huā hai āshnā dil
ki ham siiñ ho gayā hai bevafā dil

maiñ apnā kār-e-vafā āzmā.ūñgā phir bhī
kahāñ maiñ tere sitam yaad karne vaalā huuñ

kahīñ aah ban ke lab par tirā naam aa na jaa.e
tujhe bevafā kahūñ maiñ vo maqām aa na jaa.e

iqrār-e-vafā kiyā thā us ne
maiñ fart-e-ḳhushī se mar gayā thā

lab tire kis liye iqrār-e-mohabbat karte
aañkh hī kah ga.ī ai jān-e-vafā kyā kyā kuchh

mujhe taḌpā rahe haiñ yaad aa ke
vo lamhāt-e-hasīñ ahd-e-vafā ke

vafā se aarī sahī mizājan
vafā kā merī javāb ho tum

kisī ne bhejā hai ḳhat pyaar aur vafā likh kar
qalam se kaam diyā hai mujhe ḳhudā likh kar

jhaTak rahī hai mirā ḳhuun apne dāman se
tumhārī teġh hai phir kyā vafā kī bū aa.e

mire lahū se agar ho ke surḳh-rū aa.e
malo to barg-e-hinā meñ vafā kī bū aa.e

rah-e-vafā meñ hameñ jitne ham-ḳhayāl mile
un hī kī āñkhoñ meñ ham ko ka.ī savāl mile

'munīr' ahl-e-tahammul kā junūñ se vāsta kyā hai
mohabbat jur.a jur.a aur vafā āhista āhista

us bevafā ne ham ko agar apne ishq meñ
rusvā kiyā ḳharāb kiyā phir kisī ko kyā

kis ke va.ade par kareñ ham e'tibār
kis ke māthe pe vafā tahrīr hai

kahūñ hasratoñ kā hujūm kyā dar-e-dil tak aa ke vo bevafā
mujhe ye sunā ke palaT gayā ki yahāñ to majma-e-ām hai

kaam aatī nahīñ vafā 'jāmī'
bārhā aazmā ke dekh liyā

kitne pahāḌ rāh-e-vafā meñ kaTe 'iram'
kitne abhī haiñ aur musībat ke sāmne