Tags-Wafa

terā bhūlā huā paimān-e-vafā
mar raheñge agar ab yaad aayā

be-vafā maiñ ne mohabbat se kahā thā aap ko
lījiye ab bā-vafā taslīm kar letā huuñ maiñ

is se baḌh kar koī aur kaise jiye umr-bhar ham ne ik bevafā ke liye
kaun sī raat āñkhoñ meñ kaaTī nahīñ kaun sā din taḌap kar guzārā nahīñ

dahr meñ rasm-e-vafā badnām ho kar hī rahī
ham bachāte hī rahe dāman ġhubār aa hī gayā

vafā kī qadar kyā hotī sitam ke ho ga.e ḳhūgar
banāyā un ko dushman ham ne de kar imtihāñ apnā

charāġh-e-rāh-e-mohabbat thī ḳhāk-e-ahl-e-vafā
qadam qadam pe 'karam' raushnī nazar aa.ī

har kalā.ī har tamannā har haqīqat har vafā
āshnā-e-halqa-e-zanjīr kar dī jā.egī

rāh-e-vafā hai ham-safro pur-azm raho haañ tez chalo
chaar qadam pe manzil hai ab raah se vāpas jaanā kyā

un shahīdān-e-vafā ke naam mere sab suḳhan
sar-bulandī jin ko hāsil hai saroñ ke darmiyāñ

kisī kī raah meñ 'fārūq' barbād-e-vafā ho kar
burā kyā hai ki apne haq meñ achchhā kar liyā maiñ ne

vafā-nā-āshnā is sādgī kī daad de mujh ko
samajh kar terī bātoñ par bharosā kar liyā maiñ ne

phir vafādār nazar aane lagā
bevafā jis se laḌā.ī thī abhī

maiñ ne to ai jān-e-jahāñ jaan dī
tum ne adā haqq-e-vafā kyā kiyā

sad kārvāñ vafā hai koī pūchhtā nahīñ
goyā matā-e-dil ke ḳharīdār mar ga.e

tujh meñ kyā baat hai ai dil ki vafā-kesh ye aql
merī bāñdī hai magar kaam tirā kartī hai

mansab-e-ishq se kuchh ohda-barā maiñ hī huā
tere kūche meñ sarafarāz-e-vafā maiñ hī huā

vafā kā ek hī jhoñkā na sah sake zālim
tirī tarah hī ye nikle terī qasam ke charāġh

sheva-e-jaur ko rakh ahl-e-vafā tak mahdūd
aam faiz-e-ḳhalish-e-dard-e-ḳhudā-dād na kar

dil hai ganjīna-e-sad-gauhar-e-asrār-vafā
ai nigāh-e-ġhalat-andāz ise barbād na kar

chamak damak meñ Duub ga.e haiñ pyaar vafā ke aslī rañg
'dev' jahāñ vāloñ meñ ab vo pahle se jazbāt kahāñ