Tags-Wafa

jo harf lauh-e-vafā pe likkhe hue haiñ un ko bhī dekh lenā
jo rā.egāñ ho ga.iiñ vo saarī ibārateñ bhī shumār karnā

us vafā-dushman se chhuT jaane ke ba.ad
ḳhud ko pā lene kā kitnā ġham rahā

na vo mire dil se bā-ḳhabar the na un ko ehsās-e-ārzū thā
magar nizām-e-vafā thā qaa.em kushūd-e-rāz-e-nihāñ se pahle

dushmanoñ kī jafā kā ḳhauf nahīñ
dostoñ kī vafā se Darte haiñ

jins-e-vafā kā dahr meñ bāzār gir gayā
jab ishq faiz-e-husn kā hāmil nahīñ rahā

ḳhud se uktā.e hue apnā burā chāhte haiñ
bas ki ab ahl-e-vafā tark-e-vafā chāhte haiñ

vafā bane na agar 'ashk' raah kā patthar
hazār jism bhare shahr meñ bane sañvre

hamāre dard kā andāza us ko kyā hogā
ki ashk hote nahīñ haiñ vafā ke lahje meñ

mumkin hai mire baad bhulā deñ mujhe lekin
tā umr unheñ merī vafā yaad rahegī

yahāñ mehr-o-vafā nādāniyāñ haiñ
ye duniyā ishq ke qābil nahīñ hai

ye dil be-mehr bhī hai bevafā bhī
nahīñ ye dil to merā dil nahīñ hai

tinke bhī tum Thaharte kahīñ dekhe haiñ tanik
chashm-e-vafā rakho na ḳhasān-e-jahāñ se tum

kuchh log the jinheñ ye sa.ādat huī nasīb
varna yahāñ kise sar-e-mehr-o-vafā na thā

aaj us bazm meñ yuuñ dād-e-vafā dī jaa.e
ai ġham-e-ishq tirī umr baḌhā dī jaa.e

aah ye rasm-e-vafā hove bar-uftād kahīñ
is sitam par bhī mirā dil usī kā mamnūñ hai

jise na dostī mahbūb aur na pās-e-vafā
us aadmī se hamesha gurez kartā huuñ

kuchh is andāz se hai husn pashīmān-e-jafā
koī māyūs-e-vafā dekhe to pyaar aa jaa.e

jab zikr chhiḌegā kahīñ arbāb-e-vafā kā
apne dil-e-marhūm ko ham yaad kareñge

bevafā kahte haiñ sabhī tum ko
kahiye is meñ qusūr kyā merā

ishq mehnat kā sila had se sivā māñgtā hai
dil vo mazdūr hai ujrat meñ vafā māñgtā hai