Tags-Wafa

zindagī ye mirī aap ke naam hai
bevafā hoñge to kidhar jā.eñge

tū samjhe na samjhe hameñ saath tere
jo karnī thī ai bevafā kar chuke ham

pindār-e-vafā tamkanat-e-hosh ḳhabar-dār
aflāk pe dhartī ke qamar dekh rahī huuñ

vafā karte use dekhā nahīñ hai
magar vo bevafā lagtā nahīñ hai

vo zulm-o-sitam Dhaa.e aur mujh se vafā māñge
jaise koī gul kar ke dīpak se ziyā māñge

ġhair be-jurm haiñ aur maiñ huuñ vafā kā mujrim
kaun aatā bhalā mujh se gunahgār ke paas

jal kar girā huuñ sūkhe shajar se uḌā nahīñ
maiñ ne vahī kiyā jo taqāzā vafā kā thā

tujh se koī gila hai na terī vafā se hai
maiñ hī tire ḳhayāl ke qābil nahīñ rahā

chalo maan leñ ye donoñ koī shai hai maslahat bhī
na sitam kā dil dukhegā na vafā malūl hogī

un se ummīd-e-vafā rakhnā bhī 'nayyar' hai fuzūl
be-muravvat sab ke sab haiñ aur nagar patthar kā hai

jab āñsuoñ pe matā-e-vafā kā dhokā thā
to reg-e-dasht ke mānind ḳhushk thiiñ āñkheñ

naza.a meñ aa ke mirī sirf ye pūchhā us ne
ab batāo kisī masraf meñ vafā bhī aa.ī

us bevafā kī yaad ke miTte hue nuqūsh
'nayyar' ham apne dil meñ utāre chale ga.e

hamārī nākāmī-e-vafā ne zamāne kī khol dī haiñ āñkheñ
charāġh kab kā bujhā paḌā hai magar añdherā kahīñ nahīñ hai

ġhazal ke sāñche meñ Dhalte haiñ TuuT jaate haiñ
vafā kī raah ke patthar bhī maiñ bhī duniyā bhī

maiñ bevafā bhī kahūñ kis tarah tujhe jānāñ
tū ban ke bād-e-sabā roz mujh se miltā rahā

mazār-e-husn se aatī hai ye sadā 'rāhī'
vafā pe dekhiye ab kaun jaan detā hai

sahrā-e-mohabbat hai sarāboñ kā tasalsul
hāsil hai faqat tishnagī 'resham' kī vafā kā

shahr-e-vafā ke saare raste terī jānib hī nikle
yā phir maiñ ne hosh gañvāyā bhuul huī sharminda huuñ

haa.e andāz-e-taġhāful ki dam-e-zikr-e-vafā
yaad un ko bhī mirā naam nahīñ aatā hai