Tags-Wafa

apne anjām se ḳhush apnī vafā par nāzāñ
muskurāte hue ham janib-e-dār aa.e haiñ

is kī vo jaane use pās-e-vafā thā ki na thā
tum 'farāz' apnī taraf se to nibhāte jaate

hamārī rūdād muḳhtasar hai vafā kahāñ kī jafā kahāñ kī
ba-rañg-e-gul muskurā diye vo ba-tarz-e-shabnam bikhar ga.e ham

maiñ ḳhud hī bevafā huuñ be-adab huuñ apnā qātil huuñ
har ik ilzām mere sar ba-alfāz-e-digar aayā

unheñ aur ilm-e-rah-e-vafā ye yaqīñ bhī aa.e to kis tarah
ki unhī ke dāman-e-nāz par kahīñ ḳhāk-e-rāh-e-vafā nahīñ

vo hazār ham pe jafā sahī koī shikva phir bhī ravā nahīñ
ki jafā to un kī ḳhatā nahīñ jinheñ koī qadr-e-vafā nahīñ

vo tere va.ade vo bāteñ vafā ḳhulūs 'farah'
maiñ khāre paanī meñ sab kuchh bahā ke aa.ī huuñ

apne apne dil ke hāthoñ donoñ hī barbād hue haiñ
maiñ huuñ aur vafā kā ronā vo haiñ aur jafā kā mātam

merī vafā to nādānī thī tum ne magar ye kyā Thānī thī
kaash na karte mujh se mohabbat kaash na hotā dil kā ye aalam

ahd-e-vafā hai aur bhī mohkam terī judā.ī ke maiñ qurbāñ
terī judā.ī ke maiñ qurbāñ ahd-e-vafā hai aur bhī mohkam

chalnā, ruknā donoñ meñ barbādī hai
dasht-e-vafā meñ aa.e to ho aahū ban kar

daaġh ban kar to rahā dāman-e-qātil pe magar
bū-e-ḳhūñ bahr-e-ḳhudā bū-e-vafā ho jaanā

va.ada aane kā vafā kiije ye kyā andāz hai
tum ne kyuuñ sauñpī hai mere ghar kī darbānī mujhe

sar-e-bazm haiñ yahī tazkire ki burā huuñ maiñ
mirā jurm hai ki maiñ bevafā nahīñ ho sakā

hai chaman kī aabrū qāfila bahār kā
bū-e-gul kā saath kyā be-vafā jidhar ga.ī

vafā-parast hai ātish-fishāñ kā rakhvālā
sanam-kade meñ barahman hai kyā kiyā jaa.e

qadīm se hai yahī rasm-o-rāh-e-mulk-e-vafā
ki āzmā.e ga.e jo the āzmā.e hue

har ek lab pe hai merī vafā ke afsāne
tire sitam ko abhī lā-zavāl honā hai

ai ahl-e-vafā dād-e-jafā kyuuñ nahīñ dete
so.e hue zaḳhmoñ ko jagā kyuuñ nahīñ dete

mirī vafā kī mukammal tū dāstāñ kar de
jahāñ pe aag nahīñ hai vahāñ dhuāñ kar de