Tags-Wafa

dāvat-e-ām hai ik rāh-e-vafā hai maiñ huuñ
vo mire saath chalā aa.e jo āsāñ samjhe

matā-e-pās-e-vafā kho nahīñ sakūñgā maiñ
kisī kā tere sivā ho nahīñ sakūñgā maiñ

kuchh qadr to karte mire iz.hār vafā kī
shāyad ye mohabbat hī nahīñ aap ke nazdīk

yaad bhī kar na sake bhuul bhī paa.e na jise
ik vahī ahd vo paimān-e-vafā rakkhā hai

chhoḌ kar mujh ko chalī ai bevafā maiñ bhī to huuñ
le ḳhabar merī bhī ai teġh-e-adā maiñ bhī to huuñ

paikān-e-neza-o-rasan-o-dār hai gavāh
sar de ke sar-buland-e-vafā ham hue ki tum

is par na qadam rakhnā ki ye rāh-e-vafā hai
sarshār nahīñ ho, ki guzar jāoge logo

ai 'razā' va.adoñ se us ke aaj kyuuñ hotā ḳharāb
kal hī kar letā vafā kā us kī tū paimāñ agar

hamāre biich koī bā-vafā nahīñ rahā hai
ye baat koī kisī ko batā nahīñ rahā hai

ab naam rahe yā na rahe ishq meñ apnā
rūdād-e-vafā daar pe dohrā to ga.e ham

rah-e-hayāt meñ jo log jāvedāñ nikle
vahī vafā-o-mohabbat ke tarjumāñ nikle

duniyā meñ vafā DhūñDne nikle the nadārat
ik bojh hai dil par mire shahtīr nahīñ hai

mar jā.egā bātoñ meñ koī ġham-zada yuuñ hī
har lahza na ho mumtahin arbāb-e-vafā kā

samajhte the ki vafā-nā-shanās hai duniyā
'surūr' ham ko bhī ik dard-āshnā to milā

is daur-e-nā-shanās meñ kuchh bhī kahūñ magar
ab dāstāñ meñ zikr-e-vafā hī na lā.ūñgā

shauq kā nāzuk daraḳht ḳhushk huā dard suuñ
husn ke bustāñ meñ tū chup se huā bevafā

aarzū armān ḳhvāhish justujū va.ade vafā
dil lagā kar tum zamānae bhar ke dhoke khāoge

zi-bas ḳhūñ-gashta-e-rashk-e-vafā thā vahm bismil kā
churāyā zaḳhm-hā-e-dil ne paanī teġh-e-qātil kā

tirī shoḳh āñkhoñ meñ bārhā ka.ī ḳhvāb dekhe haiñ pyaar ke
tirā pyaar merā nasīb hai kisī aur ko ye vafā na de

mirī zindagī kisī moḌ par kabhī āñsuoñ se vafā na de
tirī aañkh kī ye ghaTā kahīñ yuuñ baras ke mujh ko rulā na de