Tags-Wafa

junūñ kā paas vafā kā ḳhayāl husn kā ġham
ka.ī charāġh jale ek aarzū ke liye

kis rañg meñ haiñ ahl-e-vafā us se na kahnā
kyuuñ phuul haiñ ḳhushbū se judā us se na kahnā

kuchh lutf kī garmī kī ḳhātir kuchh jān-e-vafā ke sadqe meñ
gesū-e-alam ke saa.e meñ rāhat sī milī hai piine meñ

haq vafā ke jo ham jatāne lage
aap kuchh kah ke muskurāne lage

ye mo.ajaza bhī kisī kī duā kā lagtā hai
ye shahr ab bhī usī be-vafā kā lagtā hai

koī baat ban ke bigaḌ ga.ī to pata chalā
mire bevafā ne karam kiyā to ḳhabar huī

ishq hai be-guzār kyuuñ husn hai be-niyāz kyuuñ
merī vafā kahāñ ga.ī un kī jafā ko kyā huā

ham-nafaso ujaḌ ga.iiñ mehr-o-vafā kī bastiyāñ
pūchh rahe haiñ ahl-e-mehr-o-vafā ko kyā huā

vafā ke naam par hargiz hinā ḳhāmosh mat rahnā
kabhī vo lauT ā.eñge tumhārī dāstānoñ meñ

sar uThāne na diyā hashr ke din bhī zālim
kuchh tire ḳhauf ne kuchh apnī vafā ne ham ko

shā.istagī mohabbateñ ulfat vafā hayā
rakkhī hai mere paas tirī sab nishāniyāñ

vo sitam na Dhaa.e to kyā kare use kyā ḳhabar ki vafā hai kyaa?
tū usī ko pyaar kare hai kyuuñ ye 'kalīm' tujh ko huā hai kyaa?

sahal-tar hogā najāt-e-ḳhalq meñ qarz-e-vafā
jaan bhī degā agar 'aḳhtar' adā ho jā.egā

us bevafā pe bas nahīñ chaltā to kyā huā
uḌtī raheñgī apne garebāñ kī dhajjiyāñ

ba-qadr-e-tishna-labī pursish-e-vafā na huī
chhalak ke rah ga.e terī nazar ke paimāne

rāh-e-vafā meñ jī ke mare mar ke bhī jiye
khelā usī tarah se kiye zindagī se ham

us ko muddat huī sabr karte hue aaj kū-e-vafā se guzarte hue
pūchh kar us gadā kā Thikānā sajan apne 'inshā' ko bhī dekh aanā sajan

maiñ tujhe bevafā nahīñ kahtā
dushmanoñ kā bayān hai pyāre

dard ke māroñ ko hī dard-āshnā paate haiñ log
be-vafāoñ meñ kahāñ bū-e-vafā paate haiñ log

ik tabassum ke evaz hech nahīñ jins-e-vafā
hañs ke jo baat kare apnā banā le mujh ko