Tags-Wafa

rafū kiyā kiye chāk-e-vafā-o-tār-e-qabā
vo rūThte rahe aur ham unheñ manā.e ga.e

maiñ un charāġhoñ kī umr-e-vafā ko rotā huuñ
jo ek shab bhī mire dil ke saath jal na sake

ġham-zada maiñ bhī nahīñ aur ġhamīñ tū bhī nahīñ
ab to pāband-e-vafā maiñ bhī nahīñ tū bhī nahīñ

na ishq hai vo na ġhālib na āstāñ na vafā
usī ke saath hī qisse bhī sañg-o-sar ke ga.e

vafā kā zikr ḳhud karnā ḳhilāf-e-rasm-e-ulfat hai
subuk ho kar na pesh-e-dost bār-e-ġham-garāñ karnā

ajī jaatī hai aaj tū vasl kī shab nahīñ kyuuñ hai milāyā laboñ se ye lab
mujhe ab to uḌāne de aish tū ab tujhe apne hai mehr-o-vafā kī qasam

mujh se kyā ho sakā vafā ke sivā
mujh ko miltā bhī kyā sazā ke sivā

mukammal ho to sachchā.ī kahāñ taqsīm hotī hai
ye kahnā hai mohabbat ke vafā ke hissa-dāroñ se

kisī ke lab pe jo aa.e naved-e-zīst bane
vahī hadīs-e-vafā jis pe e.atibār na ho

ye musalsal tirā paimāñ tirī paimāñ-shikanī
ham ise hāsil-e-paimān-e-vafā kahte haiñ

maanā vafā barā.e-vafā ittifāq thī
tum sā rahā koī na koī ham sā rah gayā

ai khiñchne vaale dekh mirī be-panāhiyāñ
aatī hai dushmanoñ se bhī bū-e-vafā mujhe

mil mil ke dostoñ ne vo dī hai daġhā mujhe
ab ḳhud pe bhī nahīñ hai gumān-e-vafā mujhe

merī vafā pe aap hī chīñ-bar-jabīñ nahīñ
maiñ ḳhud bhī sochtā huuñ ye kyā ho gayā mujhe

phir baat baat meñ hai lachak iltifāt kī
kyā phir dikhāoge koī ḳhvāb-e-vafā mujhe

maiñ tark rasm-e-vafā bevafā se kyuuñ kartā
thā iḳhtilā-e-ḳhayālāt dushmanī to na thī

husn aisā hai ki ā.īne ko hairāñ kar de
ik vafā kī hī kamī hai mire harjā.ī meñ

aayā hī thā abhī mire lab pe vafā kā naam
kuchh dostoñ ne haath meñ patthar uThā liye

ik baar bhī tharrā.ī na lau sham-e-vafā kī
sunte the zamāne kī havā tez bahut hai

vafā kī raat koī ittifāq thī lekin
pukārte haiñ musāfir ko sā.ebāñ kyā kyā