Tags-Wafa

ham ne rah-e-vafā meñ luT kar qadam qadam par
chhīne haiñ rahzanoñ se atvār rahzanī ke

vo bevafā mujhe dil se nikāl kar dekhe
maiñ us ke zehn meñ taḌpūñ sadā sharar kī tarah

tark-e-vafā bhī jurm-e-mohabbat sahī magar
milne lageñ vafā kī sazā.eñ to kyā kareñ

kaam aa sakīñ na apnī vafā.eñ to kyā kareñ
us bevafā ko bhuul na jaa.eñ to kyā kareñ

mujh ko na dil pasand na vo bevafā pasand
donoñ haiñ ḳhud-ġharaz mujhe donoñ haiñ nā-pasand

yahī vafā kā sila hai to koī baat nahīñ
ye dard tum ne diyā hai to koī baat nahīñ

garāñ hai jins-e-vafā aur mushtarī nāyāb
hazār baar luTā huuñ ki dil ġhanī hai bahut

ham kareñ tark-e-vafā achchhā chalo yuuñ hī sahī
aur agar tark-e-vafā se bhī na rusvā.ī ga.ī

na ham duā se ab na vafā se talab kareñ
ishq-e-butāñ meñ sabr ḳhudā se talab kareñ

bujhā diye haiñ ḳhud apne hāthoñ mohabbatoñ ke diye jalā ke
mirī vafā ne ujaaḌ dī haiñ umiid kī bastiyāñ basā ke

yāroñ ko bahut pyaar hai zindān-e-vafā se
lekin kisī dīvār meñ dar hai ki nahīñ hai

lahū ko pālte phirte haiñ ham hinā kī tarah
badal ga.e haiñ mazāmīñ tirī vafā kī tarah

ham aitabār-e-vafā kā gumāñ kareñ bhī to kyā
vo aaj sūrat-e-gul haiñ to kal sabā kī tarah

maiñ toḌūñ ahd-o-paimān-e-vafā ye ho nahīñ saktā
vo hote haiñ to ho jaa.eñ judā ye ho nahīñ saktā

use to pās-e-ḳhulūs-e-vafā zarā bhī nahīñ
magar ye aas kā rishta ki TūTtā bhī nahīñ

ab tak jalā rahī hai hameñ tohmatoñ kī dhuup
ham to ujaaḌ ho ga.e fasl-e-vafā ke ba.ad

tahzīb-o-tamaddun ko ḳhulūs aur vafā ko
'āzam' hī nahīñ aaj sabhī DhūñD rahe haiñ

kabhī vo misl-e-gul mujhe misāl-e-ḳhār chāhiye
kabhī mizāj-e-mehrbāñ vafā-shi.ār chāhiye

ye bhī to sazā hai ki giraftār-e-vafā huuñ
kyuuñ log mohabbat kī sazā DhūñDh rahe haiñ

duniyā se vafā kar ke sila DhūñDh rahe haiñ
ham log bhī nādāñ haiñ ye kyā DhūñDh rahe haiñ